ԵՐԵՒԱՆ.- Պելոռուսի նախագահ Ալեքսանտր Լուքաշենքօ ռուսական «Ռոսիա» պատկերասփիւռի կայանին տուած հարցազրոյցի մը ընթացքին խօսած էր Ռուսիա-Պելոռուս միութենական պետութեան մասին եւ այդ ծիրին մէջ արտայայտութիւններ ունեցած էր Հայաստանի հասցէին:
«Պելոռուսը արդէն այնտեղ է։ Կը կարծեմ, Ղազախստանի համար լաւ դաս էր: Եթէ կ՛ըսէք, ժամկէտը 15 տարի է, վստահ եմ, որ Ուքրանիան հոն պիտի ըլլայ, եթէ սխալներ թոյլ չտանք: Իսկ մնացածը՝ ըստ պարագիծի… այդ հզօրութեան միաւորման աւարտէն ետք, կամ միաւորման ընթացքին… իրենք ո՞ւր պիտի յայտնուին: Հայաստանը փախչելու տեղ չունի… ի՞նչ է, կը կարծեք, անոնք մէկու մը պէ՞տք են… իրենք արդէն տեսած են, Նիկոլ Վովաեւիչը ատիկա արդէն տեսած է», ըսած էր Լուքաշենքօ:
8 Փետրուարին Հայաստանի Հանրապետութեան արտաքին գործոց նախարարութիւնը արձագանգեց Հայաստանի մասին Ալեքսանտր Լուքաշենքոյի յայտարարութիւններուն:
Հայաստանի արտաքին գործոց նախարարութեան մամլոյ բանբեր Վահան Յունանեանը, լրատուամիջոցներու հարցումներուն ի պատասխան, Պիելոռուսիոյ նախագահի յայտարարութեան արձագանգած է հետեւեալ ձեւով. «Համոզուած ենք, որ Պիելոռուսիոյ նախագահին աշխարհաքաղաքական ինքնատիպ վերլուծութիւնները նպատակ ունին սպասարկելու նախ եւ առաջ սեփական ներքին քաղաքական օրակարգը եւ որեւէ առնչութիւն չունին Հայաստանի եւ անոր արտաքին քաղաքականութեան հետ»:
Վահան Յունանեան նաեւ հաստատած է այն տեղեկութիւնը, որ Հայաստանի մէջ Պիելոռուսիոյ արտակարգ եւ լիազօր դեսպան Ալեքսանտր Քոնիւք երէկ` 8 փետրուարին, եղած է Հայաստանի արտաքին գործոց նախարարութեան մէջ: