Հայաստանի ու Ազրպէյճանի միջեւ խաղաղութեան հասնելու հարցին մէջ Ֆրանսայի դիրքորոշումը կը մնայ անփոփոխ: «Ազատութիւն» ձայնասփիւռի կայանը կը հաղորդէ, որ այս մասին յայտարարած է Ֆրանսայի արտաքին գործոց նախարարութիւնը:
Լրագրողները հետաքրքրուած են` Ֆրանսայի կառավարութիւնը ինչպէ՞ս կ՛արձագանգէ Ազրպէյճանի նախագահ Իլհամ Ալիեւին, որ քննադատած էր նախագահ Մաքրոնը եւ պնդած, թէ ան «փողոցային բառապաշար օգտագործած է» «Ֆրանս 2»-ին տուած հարցազրոյցին մէջ, եւ այլեւս չի կրնար հայ-ազրպէյճանական յարաբերութիւններուն մէջ անաչառ միջնորդ ըլլալ:
Մաքրոն այդ հարցազրոյցին մէջ պնդած էր, որ Ռուսիան կ՛ապակայունացնէ Հարաւային Կովկասի մէջ կացութիւնը եւ Թուրքիոյ մասնակցութեամբ Ազրպէյճանի խաղը կը խաղայ:
«Նախագահ Ալիեւի այդ խօսքերը որեւէ կերպով չեն շեղեր Ֆրանսայի` ամբողջ ուժով հայ-ազրպէյճանական կարգաւորման նպաստելու ջանքերը: Հանրապետութեան նախագահի յանձնառութեան շնորհիւ է, որ կարելի դարձաւ քառակողմանի հանդիպում կազմակերպել 6 հոկտեմբերին` նախագահ Ալիեւի, Եւրոպական խորհուրդի ղեկավար Շարլ Միշելի եւ վարչապետ Փաշինեանի մասնակցութեամբ», յայտարարած է Ֆրանսայի արտաքին գործոց նախարարութիւնը` աւելցնելով, որ Փարիզ լիովին կ՛աջակցի Եւրոպական Միութեան հետ սկսած նախաձեռնութեան, որուն նպատակն է Հայաստանի եւ Ազրպէյճանի միջեւ խաղաղութեան համաձայնագիր կնքել: