Յարաբերութիւններու կարգաւորման հարցերով Հայաստանի եւ Թուրքիոյ յատուկ ներկայացուցիչները մօտ օրէն կրնան հանդիպիլ: «Սփութնիք Արմենիա» կը հաղորդէ, որ այս մասին յայտնած է Թուրքիոյ արտաքին գործոց նախարար Մեւլութ Չաւուշօղլու` իր մալեզիացի պաշտօնակից Սեյֆուտտին Ապտալլայի հետ հանդիպումէն ետք:
«Յարաբերութիւններու կարգաւորման հոլովոյթին սկսելու համար մենք յատուկ ներկայացուցիչներ նշանակած ենք: Մօտ օրէն անոնք բանակցութիւններ պիտի վարեն», նշած է Չաւուշօղլու:
Թուրքիոյ արտաքին գործոց նախարարը չէ յստակացուցած յառաջիկայ հանդիպումին մանրամասնութիւնները:
Միւս կողմէ, Հայաստանի արտաքին գործոց նախարարութեան մամլոյ բանբեր Վահան Յունանեան յայտնեց, որ այդ հանդիպման ժամկէտի յստակացումէն ետք հանրութիւնը պատշաճ կերպով տեղեակ պիտի դառնայ:
Թուրքիոյ արտաքին գործոց նախարարը 13 դեկտեմբերին յայտարարած էր, որ Անգարան ու Երեւանը յարաբերութիւններու կարգաւորման համար յատուկ ներկայացուցիչներ պիտի նշանակեն: Յաջորդ օր Հայաստանի արտաքին գործոց նախարարութեան բանբերը հաստատած էր այդ տեղեկութիւնը:
Թրքական կողմի ներկայացուցիչ նշանակուած է Միացեալ Նահանգներու մէջ Թուրքիոյ նախկին դեսպան Սերտար Քըլըճը, իսկ Հայաստանի Հանրապետութեանը` Ազգային ժողովի փոխնախագահ Ռուբէն Ռուբինեանը:
Միւս կողմէ, Ֆրանսայի արտաքին գործոց նախարարը անդրադարձաւ Հայաստանի եւ Թուրքիոյ միջեւ յարաբերութիւններու կարգաւորման գործընթացին եւ ողջունեց յատուկ ներկայացուցիչներ նշանակելու վերաբերող յայտարարութիւնները: Ֆրանսա հաստատեց, որ ամբողջական կերպով կ՛աջակցի այս գործընթացին: