Հայաստանի Հանրապետութեան արտաքին գործոց նախարար Արարատ Միրզոյեան եւ Լիբանանի արտաքին գործոց եւ արտերկրի լիբանանցիներու հարցերու նախարար Ապտալլա Պու Հապիպ 4 մարտին ուղերձներ փոխանակած են երկու երկիրներուն միջեւ դիւանագիտական յարաբերութիւններու հաստատման 30-ամեակին առիթով:
Արարատ Միրզոյեան իր ուղերձին մէջ նշած է, որ 30 տարի առաջ հաստատելով դիւանագիտական յարաբերութիւններ` Հայաստան եւ Լիբանան ամրագրեցին երկու ժողովուրդներու բազմադարեան բարեկամութիւնը պետական համագործակցութեան սկիզբով: Ան ընդգծած է լիբանանահայ համայնքի եզակի եւ անգնահատելի դերը երկու եղբայրական երկիրներուն միջեւ յարաբերութիւններու ամրապնդման գործին մէջ:
Հայաստանի արտաքին գործոց նախարարը շեշտած է, որ երկու ժողովուրդներու դարաւոր բարեկամութիւնը ամուր հիմք ստեղծեց ձեւաւորելու երկկողմանի եւ բազմակողմանի համագործակցութեան լայնածիր եւ ընդգրկուն դաշտ, ինչպէս նաեւ` միջմարդկային յարաբերութիւններու լայն շրջանակ, որ լաւագոյնս դրսեւորուած է մարտահրաւէրները եւ դժուար օրերը կողք-կողքի յաղթահարելու վճռականութեամբ եւ պատրաստակամութեամբ:
Մեծապէս կարեւոր նկատելով հայ-լիբանանեան յարաբերութիւններու ջերմ աւանդութիւնները` Արարատ Միրզոյեան վստահութիւն յայտնած է, որ «միացեալ ջանքերով կարենանք նոր բովանդակութիւն հաղորդել երկկողմանի փոխշահաւէտ համագործակցութեան լայն շրջանակին»:
Իր կարգին, նախարար Ապտալլա Պու Հապիպ իր ուղերձին մէջ ընդգծած է, որ հայ-լիբանանեան դիւանագիտական յարաբերութիւններու հաստատման 30-ամեակը կը նշուի երկկողմանի փոխշահաւէտ համագործակցութեան խորացման ամուր հաստատակամութեամբ:
Լիբանանի արտաքին գործոց նախարարը նշած է, որ Հայաստանի հետ դիւանագիտական յարաբերութիւններու հաստատումը երկու ժողովուրդներու պատմական բարեկամութեան բնական շարունակականութիւնն էր, ուր իր ուրոյն դերը ունի Լիբանանի հայ համայնքը` իբրեւ լիբանանեան հասարակական կառուցուածքի ընդգրկուն եւ առանցքային բաղադրիչ:
Նախարար Պու Հապիպ իր ուղերձին մէջ կարեւոր նկատած է երկու երկիրներուն եւ ժողովուրդներուն ամուր բարեկամութիւնը խաղաղութեան եւ բարդ ժամանակներու ատեն` իր երախտագիտութիւնը յայտնելով ՖԻՆԻՒԼ-ի ուժերուն մէջ Հայաստանի մասնակցութեան համար եւ հաստատակամ մնալով Հայաստանի անվտանգութեան ու տարածքային ամբողջականութեան Լիբանանի անխախտ դիրքորոշման: