ՆՈՒԱՐԴ ՏԱՐԱԳՃԵԱՆ ՄԱՏՈՅԵԱՆ
Ինքնադատութիւնը կը պահանջէ՝ ճանչնալ մեր ինքնութիւնը,
իր դրական ու բացասական կողմերով:
Տեսնել մեր թերութիւններն ու սխալները,
ինքնասրբագրումի լուրջ աշխատանք մը կատարելով:
Ազգեր ու ժողովուրդներ կը յառաջդիմեն,
երբ կը յաջողին ուղղել իրենց սխալները:
Երբ կը փորձեն ըմբռնել իրենց ազգային
պայքարին էութիւնն ու նպատակը:
Կեանքը, երազանքն ու յոյսը չեն աւարտիր երբեք:
Այլ՝ կը յարատեւեն, կ՜ապրին բոլոր ժամանակներուն մէջ,
կը վառուին գալիք բոլոր արշալոյսներու մէջ:
Նոր արշալոյս մը կը սպասէ մեր ազգին, հաւատացէք:
Այդ այգաբացը պիտի գայ, երբ կարենանք ազգին
ու հայրենիքին նկատմամբ մեր ունեցած սէրը աւելի
գիտակցական հիմերու վրայ դնել:
Եթէ անգամ մը ճանչնանք մենքզմեզ, ընդունինք մեր
սխալները, չփորձենք քօղարկել իրականութիւնները:
Պիտի կարենանք անաչառ ու վայելուչ քննադատութեամբ,
լայն ու պայծառ հայեացքով դիտել մեր շուրջը:
Պիտի կարենանք ազնիւ ու բարեացակամ վեաբերմունք
ունենալ իրար հանդէպ:
Եւ վերջապէս՝ պիտի կարենանք հարթել արտաքին
եւ ներքին քաղաքականութեան կարեւոր հարցեր:
Համատեղ ուժերով ստեղծելու ուժեղ իշխանութիւն,
որ երաշխիքն է ուժեղ պետութեան:
Մեր Ապագան միաձոյլ քաղաքական ուժի մէջ է…