Հայաստանի Հանրապետութեան մշակոյթի նախարարութեան եւ Արցախի Հանրապետութեան մշակոյթի, երիտասարդութեան հարցերու եւ զբօսաշրջութեան նախարարութեան միջեւ յուշագիր պիտի ստորագրուի` պատմամշակութային ժառանգութեան պահպանութեան բնագաւառին մէջ համագործակցութեան համար:
Այս առիթով՝ ՀՀ մշակոյթի նախարար Արմէն Ամիրեան, 3 Փետրուարին, երկօրեայ աշխատանքային այցով պիտի մեկնի Արցախ:
ՀՀ մշակոյթի նախարարութեան հասարակայնութեան հետ կապերու բաժինէն փոխանցուած տեղեկոթիւններով՝ փաստաթուղթը կը նախատեսէ ոլորտային փոխգործակցութիւն, համագործակցութիւն պատմամշակութային անշարժ յուշարձաններու պետական հաշուառման, պահպանութեան, վերականգնման, օգտագործման, հնագիտական հրատապ պեղումներու, յուշարձաններու արձանագրութեան գրասենեակի վարման ոլորտներուն մէջ եւ այլն:
Ծրագիրներու իրականացման նպատակով պիտի ստեղծուին համատեղ աշխատանքային խումբեր:
Արցախի իր պաշտօնակից Սերգէյ Շահուերդեանի հետ Արմէն Ամիրեան պիտի քննարկէ նաեւ յստակ հնարաւորութիւնները` «Գորիսը ԱՊՀ մշակութային մայրաքաղաք» ծրագիրի շարք մը ձեռնարկներ նաեւ դէպի Արցախ ընդլայնելու համար (ձեռնարկները Հայաստանի մէջ պիտի սկսին 2018-ի գարնան` շարունակուելով մինչեւ Նոյեմբեր):