ԵՐԵՒԱՆ, «Արմէնփրէս».- Հայաստանի արտաքին գործոց նախարար Արարատ Միրզոյեան 29 Ապրիլին հեռաձայնային զրոյց ունեցաւ Ռուսիոյ արտաքին գործոց նախարար Սերկեյ Լաւրովի հետ:
Միրզոյեան համաձայնութիւն յայտնեց 13 Մայիսին Տուշանպէի մէջ տեղի ունենալիք ԱՊՀի արտաքին գործոց նախարարներու խորհուրդի նիստի ծիրին մէջ, Հայաստանի, Ռուսիոյ եւ Ատրպէյճանի արտաքին գործոց նախարարներու եռակողմ հանդիպում իրականացնելու ռուսական կողմին առաջարկին:
Զրուցակիցները գոհունակութիւն յայտնեցին Հայաստանի վարչապետին Ռուսիա պաշտօնական այցելութեան արդիւնքներուն համար, վերահաստատեցին կողմերուն յանձնառութիւնը՝ Նիկոլ Փաշինեանի եւ Վլատիմիր Փութինի 19 Ապրիլի միացեալ յայտարարութեան դրոյթներուն: Քննարկուեցան նախորդ տարիներուն եռակողմ յայտարարութիւններով ստանձնած պարտաւորութիւններու իրականացման ընթացքը, անդրադարձ կատարուեցաւ Հայաստանի եւ Ատրպէյճանի միջեւ սահմանազատման եւ սահմանային ապահովութեան հարցերու յանձնաժողովի կազմութեան:
Միրզոյեան վերահաստատեց Հայաստանի դիրքորոշումը` տարածաշրջանային խաղաղութեան ու կայունութեան հաստատման ուղղուած գործընթացներուն, Ատրպէյճանի հետ խաղաղութեան համապարփակ պայմանագիրին շուրջ բանակցութիւններուն վերաբերեալ:
Հայաստան-Ատրպէյճան կապերու ծիրին մէջ յայտարարուեցաւ, որ Հայաստանի Անվտանգութեան խորհուրդի քարտուղար Արմէն Գրիգորեան 2 Մայիսին կը ծրագրէ հանդիպում ունենալ Ատրպէյճանի նախագահի օգնական Հիքմեթ Հաճիեւի հետ, Պրիւքսէլի մէջ՝ քննարկելու երկու երկիրներուն յարաբերութիւններուն վերաբերող հարցեր։
Ան հաւանական նկատեց, որ այդ հանդիպման կրնայ յաջորդել Փաշինեան-Ալիեւ հանդիպումը: «Եթէ մենք կարողանանք այն բոլոր հարցերի պատասխանները ստանալ Բրիւսելում, ապա կարող ենք նաեւ քննարկել երկրի առաջնորդների մակարդակով հանդիպում Բրիւսելում», նշեց Անվտանգութեան խորհուրդի քարտուղարը:
Պատասխանելով լրագրողի մը այն հարցումին, թէ արդեօք Հաճիեւի հետ հանդիպումը կարելի՞ է տեղաւորել խաղաղութեան համաձայնագիրի նախապատրաստման պարունակին մէջ՝ Գրիգորեան ըսաւ. «Հայաստան-Ադրբեջան յարաբերութիւնների կարգաւորման կոնտեքստում կարող էք տեղաւորել, քանի որ Հայաստան-Ադրբեջան յարաբերութիւնները, կարող ենք ասել, այս պահին մի քանի ուղղութիւններ ունեն: Եռակողմ աշխատանքային խումբն ապաշրջափակման թեմայով; Այս պահին քննարկւում է նաեւ սահմանազատման, սահմանագծման աշխատանքային խմբերի ձեւաւորումը: Գրեթէ վերջնական փուլում է, կարծում եմ` մօտակայ ժամանակներս արդէն կը յայտարարուի աշխատանքային խմբի ձեւաւորման մասին: Կայ նաեւ խաղաղութեան օրակարգի քննարկման ուղղութիւնը` արտգործնախարարների մակարդակով: Կայ նաեւ անվտանգութեան ուժերի ղեկավարների պարբերաբար հանդիպում, որտեղ քննարկւում են Հայաստան-Ադրբեջան յարաբերութիւնների որոշ հարցեր: Կայ նաեւ իմ եւ Հիքմեթ Հաջիեւի հանդիպման հարթակը, որտեղ քննարկում ենք Հայաստան-ադրբեջան յարաբերութիւններին վերաբերող մի շարք հարցեր»: