ԵՐԵՒԱՆ, «Արմէնփրէս».- Թիֆլիսի մէջ հիւրընկալուելով՝ Հայաստանի ֆութպոլի հաւաքականը մրցումին առաջին կօլը նշանակեց 33րդ վայրկեանին, երբ յառաջապահ Տիգրան Բարսեղեանի փոխանցումէն ետք միջնապահ եւ խմբապետ Գէորգ Ղազարեան ցնցեց ուրկանը: Յաջորդ յարձակումին Գէորգ Ղազարեան դարձեալ հարուածեց դէպի բերդ, սակայն գնդակը դպաւ հորիզոնական ձողին:
40րդ վայրկեանին, վրացիներու վճռական յարձակումը կօլի չվերածուեցաւ, երբ Հայաստանի բերդապահ Դաւիթ Եուրչենքօ բացառիկ խաղարկութեամբ մը երկու անգամ զսպեց գնդակը:
Առաջին կիսախաղը աւարտեցաւ 1-0 արդիւնքով: Երկրորդ կիսախաղին Վրաստան աւելի բուռն պայքար մղեց եւ 64րդ վայրկեանին ձեռք ձգեց փենալթի մը, զոր կօլի վերածեց յառաջապահ Վալերի Քազայիշվիլի:
Հայաստանի հաւաքականը տեղի չտուաւ եւ բարձր կորովը պահպանելով՝ շարունակեց պայքարը, որուն շնորհիւ գերմանական «Հոֆենհայմ» խումբի յառաջապահ Սարգիս Ադամեան 86րդ վայրկեանին նշանակեց Հայաստանի յաղթանակի կօլը՝ Տիգրան Բարսեղեանէն փոխանցում մը ստանալով:
Հայաստան այժմ Գ. դասակարգի Բ. խմբակին մէջ ութ կէտով կը գտնուի երկրորդ դիրքին վրայ՝ մէկ կէտով զիջելով յառաջատար Հիւսիսային Մակեդոնիոյ, որուն դէմ պիտի մրցի 18 Նոյեմբերին, Կիպրոսի մէջ:
Յաջորդ հանգրուանին տոմսը կ՛ապահովէ իւրաքանչիւր խմբակի առաջին դիրքը գրաւողը:
Կիրակի օրուան մրցումին Հայաստան դաշտ ներկայացած էր հետեւեալ կազմով. Դաւիթ Եուրչենքօ, Յովհաննէս Համբարձումեան, Վարազդատ Հարոյեան, Անտրէ Քալիսիր, Արման Յովհաննիսեան, Արտակ Գրիգորեան, Սոլոմոն Ուտօ, Տիգրան Բարսեղեան, Գէորգ Ղազարեան, Սարգիս Ադամեան եւ Ալեքսանտր Կարապետեան: