ԵՐԵՒԱՆ, «Ազատութիւն».- Հայաստանի արտաքին գործոց նախարարութեան խօսնակ Վահան Յունանեան 13 Յունուարին յայտարարեց, որ, իրենց տպաւորութեամբ, Թուրքիոյ կառավարութիւնը եւս կը կիսէ առանց նախապայմանի երկխօսութեան սկսելու մօտեցումը: Սակայն, նոյն օրն իսկ Թուրքիոյ նախագահ Ռեճեփ Թայիփ Էրտողան դիտել տուաւ, որ Ատրպէյճանի կողմէ հողերու ազատագրութեամբ Կովկասի մէջ նոր փուլ կը մտնենք: «Հայաստանի հետ կարգաւորման գործընթացի սկսած ենք, որպէսզի ձեռնարկուող քայլերը արդիւնք տան, Հայաստան պէտք է օգտագործէ տարածաշրջանային խաղաղութեան կարեւորութիւնը եւ այս առումով կարեւոր է, որ Հայաստան դրական յարաբերութիւններ հաստատէ Ատրպէյճանին հետ», հաստատեց Էրտողան Անգարայի մէջ հաւատարմագրուած Եւրոպական Միութեան երկիրներու դեսպաններուն հետ հանդիպումին:
Թուրքիոյ կողմէ առաջադրուած այս նախապայմանը չտեսնող Յունանեան յայտնեց նաեւ, թէ կ՛ակնկալեն, որ Հայաստան-Թուրքիա երկխօսութեան շնորհիւ երկու երկիրներուն միջեւ սահմանը կը բացուի:
«Հայաստանի ակնկալիքներն այդ երկխօսութիւնից, ըստ էութեան, նոյնն են, ինչ եղել են 1990ականների սկզբներից ի վեր: Մենք ակնկալում ենք, որ գործընթացի արդիւնքում Հայաստանի եւ Թուրքիայի միջեւ դիւանագիտական յարաբերութիւններ կը հաստատուեն եւ երկու երկրների միջեւ սահմանը, որը Թուրքիայի կողմից միակողմանիօրէն փակուել էր 90ականների սկզբին, կը բացուի», նշեց խօսնակը:
Յունանեան ըսաւ, որ Հայաստան մնայուն կերպով յայտարարած է, որ պատրաստ է Թուրքիոյ հետ յարաբերութիւններու լուծման՝ առանց որեւէ նախապայմանի. «Այս առումով եւս պէտք է փաստեմ, որ Հայաստանի մօտեցումը որեւէ փոփոխութիւն չի կրել՝ նոյն դիրքորոշումն արտացոլուած է նաեւ ՀՀ կառավարութեան 2021-2026թթ. ծրագրում», դիտել տուաւ ան:
Անդրադառնալով 14 Յունուարին, Հայաստանի եւ Թուրքիոյ յատուկ ներկայացուցիչներուն Մոսկուայի մէջ հանդիպումին՝ Վահան Յունանեան նշեց, որ անիկա տեղի պիտի ունենայ ռուսական կողմին հիւրընկալութեամբ եւ պիտի կրէ ճանաչողական բնոյթ:
«Դժուար է ակնկալել, որ մէկ հանդիպման արդիւնքում հնարաւոր կը լինի ունենալ շօշափելի արդիւնքներ, սակայն դրանով կը տրուի գործընթացի մեկնարկը», ըսաւ Յունանեան: