Հայաստան Համահայկական հիմնադրամը «Քորոնա» ժահրին դէմ պայքարելու համար կոչ կ՛ուղղէ՝ համախմբուելու եւ համայն հայութեան ներդրումով աջակցելու առողջապահութեան ոլորտին։
Ստորեւ հիմնարկին յայտարարութիւնը․
«Նոր «Քորոնա» ժահրի COVID-19 համաճարակին տարածումով, միջազգային հանրութիւնը կը համախմբուի եւ համապատասխան գործողութիւններու կը ձեռնարկէ: Ինչպէս քաջ յայտնի է, ճգնաժամերու ընթացքին ամբողջ աշխարհի հայութիւնը միշտ համախմբուած է մէկ նպատակի շուրջ` օգնելու իրարու եւ իր հայրենիքին:
«Հայաստանի կառավարութիւնը եւ առողջապահութեան նախարարութիւնը քաղաքացիներուն պարբերաբար թարմացուող տեղեկատուութիւն կը տրամադրէ թէ՛ ներկայ իրավիճակին եւ թէ վարակի տարածման յետագայ աճը կանխելու համար անհրաժեշտ քայլերուն մասին:
«Մեր բժիշկները եւս, վտանգելով իրենց կեանքը՝ անձնուիրաբար եւ ջանասիրաբար կ՛աշխատին հիւանդներուն օգնելու եւ ժահրին յետագայ տարածումը կանխելու նպատակով:
Ժահրի աճի հնարաւորութեամբ պայմանաւորուած` առողջապահութեան ոլորտին անհրաժեշտ է համայն հայութեան աջակցութիւնը: Այս իսկ պատճառով, Հայաստան Համահայկական հիմնադրամը իր ստացած նուիրատուութիւնները պիտի համախմբէ եւ այս նախաձեռնութեան ընթացքին հաւաքուած ամբողջ գումարը պիտի ուղղէ առողջապահութեան ոլորտին անհրաժեշտ բժշկական պարագաներու տրամադրման, նաեւ այն ընտանիքներուն, որոնք ստեղծուած այս իրավիճակը դիմակայելու կարիքը ունին:
«Նուիրատութիւններու համար այցելել Հայաստան Համահայկական հիմնադրամին www.himnadram.org/en/donate կայքէջը»։