Հայոց ցեղասպանութեան 107-ամեակին մասին լիբանանեան մամուլը ունեցաւ իր անդրադարձը:
«Նիտա Ուաթան» օրաթերթը հրատարակած էր յօդուած մը, որ կը կրէր լրագրող Նաուալ Նասըրի ստորագրութիւնը:
Նասըր անդրադարձաւ հայ ժողովուրդին կողմէ Հայ դատին կառչած մնալուն իրականութեան, իրաւունքներուն եւ յիշողութեան տէր կանգնելու վճռականութեան, ինչպէս նաեւ անձնատուր չըլլալու իրականութեան:
Ան հարցազրոյց մը կատարած էր Պալամանտ համալսարանի մարդկային գիտութեանց բաժանմունքի նախկին նախագահ, գրաքննադատ Ճորճ Տէօրլեանի հետ, որ կը հաստատէ, որ հայ ժողովուրդը խաղաղ կերպով կը մղէ իր պայքարը եւ կը յաղթէ` փաստելով, որ ինք կարողութիւն ունի իր իրաւունքներուն տէր կանգնելու:
«Նահար» օրաթերթին մէջ լոյս տեսաւ Ալիս Պօղոսեանի յօդուածը` «Որպէսզի միշտ յիշենք. 24 ապրիլ 1915… 24 ապրիլ 2022»:
Ա. Պօղոսեանի յօդուածը անդրադարձաւ հայկական ինքնութեան միշտ կառչած մնալու կարեւորութեան` աւելցնելով, որ 24 ապրիլը առիթ մը չէ, որուն ընթացքին մարդիկ իրենց հայ ըլլալը կը յիշեն եւ կը կատարեն ժողովրդահաճոյ յայտարարութիւններ, որոնք յաջորդ օրն իսկ կը մոռցուին:
Ա. Պօղոսեան ընդգծեց հայկական ինքնութիւնը պահպանելու հանապազօրեայ ջանքերուն անհրաժեշտութիւնը եւ կոչ ուղղեց յանկարծ իրենց հայութիւնը յիշած անձնաւորութիւններուն վերջ տալու իրենց կեղծ զգացումներուն եւ յաւելաբանութիւններուն:
Ա. Պօղոսեան շեշտեց հայ ժողովուրդին իրաւունքները վերադարձնելու կարեւորութիւնը` ընդգծելով, որ Արցախի վերջին պատերազմը նաեւ փաստած է հայ ժողովուրդի իրաւունքներուն իրաւացիութիւնը:
Ան հաստատեց, որ միջազգային ընտանիքին, Եւրոպայի, Միացեալ Նահանգներու եւ այլոց կողմէ Թուրքիան անպատիժ ձգելը առիթ կու տայ, որ ան շարունակէ իր ոճիրները:
Ա. Պօղոսեան շեշտեց, որ հայ ժողովուրդը պիտի շարունակէ պայքարիլ, «իսկ անոնք, որոնք իրենց հայկականութիւնը ժամանակաւոր կերպով կը յիշեն, պէտք է լուռ մնան եւ իրենց անունները չշահագործեն` արձանագրելու համար տոն քիշոտեան կեցուածքներ, որոնք յաջորդ օրն իսկ կը ցնդին», աւելցուց ան:
«Ժումհուրիա» օրաթերթին մէջ լոյս տեսաւ Լութֆիկ Այվազեանի յօդուածը, որ կը կրէ հետեւեալ խորագիրը. «Հաւաքական ցեղասպանութիւնն ու կոկորդիլոսի արցունքները»:
Լ. Այվազեան անդրադարձած է ցեղասպանութիւն բառին գիտական բացատրութեան, ապա 24 ապրիլ 1915-ին պատահած ցեղասպանութեան, որ Օսմանեան կայսրութեան կողմէ գործադրուած կանխամտածուած ցեղասպանութիւն մըն էր: Ան անդրադարձաւ նաեւ 1920-ի Շուշիի սպանդին, որուն զոհ գացին աւելի քան 20 հազար հայեր:
Յօդուածը կ՛անդրադառնայ նաեւ Համաշխարհային Ա. պատերազմի հետեւանքներուն, Սեւրի եւ Լոզանի խորհրդաժողովներուն եւ ստորագրուած համաձայնագիրներուն տարբերութիւններուն:
Լ. Այվազեան լուսարձակի տակ կ՛առնէ Հայ դատի բացատրութիւնը եւ կը ներկայացնէ սփիւռքահայութեան կողմէ Հայ դատի հետապնդման աշխատանքները շարունակելու` ամբողջ աշխարհին իր դատը ներկայացնելու, ճանաչում եւ հատուցում պահանջելու ջանքերը:
Լ. Այվազեան ակնարկեց նաեւ Արցախի դէմ Ազրպէյճանի կողմէ սանձազերծուած վերջին պատերազմին եւ այդ անհաւասար կռիւին ընթացքին ամբողջ աշխարհին ցուցաբերած անտարբերութեան:
Լ. Այվազեան իր յօդուածը կ՛աւարտէ հաստատելով, որ Հայոց ցեղասպանութեան 107-ամեակին առիթով Թուրքիա կը շարունակէ ուրանալ ցեղասպանութիւնը, կը մերժէ հայոց վերադարձնել անոնց իրաւունքները, իսկ անոր դաշնակից Ազրպէյճան կը շարունակէ Հայաստանին ստիպել անձնատուական այլ համաձայնագիրներ ստորագրել: «Այս բոլորին կողքին աշխարհ դիտորդի դերին մէջ է, կարծէք բան չէ փոխուած` ոճրագործը իր դաւադիր ծրագիրները կը շարունակէ, իսկ կոկորդիլոսները կը շարունակեն արցունք թափել…», կ՛եզրափակէ Լ. Այվազեան:
Նշենք, որ լիբանանեան լսատեսողական լրատուամիջոցները անդրադարձան Ցեղասպանութեան 107-ամեակի ոգեկոչման ձեռնարկներուն, յատկապէս կիրակի, 24 ապրիլ 2022-ին, Պուրճ Համուտէն դէպի Անթիլիասի մայրավանք կատարուած պահանջատիրական երթին:
Այդ լրատուամիջոցներէն էին «Էլ. Պի. Սի.» եւ «Էմ. Թի. Վի.» պատկերասփիւռի կայանները, «Ժումհուրիա»-ի դիմատետրեան կայանը` արաբերէն եւ անգլերէն լեզուներով: