ՈՒԱՇԻՆԿԹԸՆ, «Ահվալ».- Միացեալ Նահանգներու Ներկայացուցիչներու տան անդամ Թետ Լիու (Դ., Քալիֆորնիա) առաջարկած է Հայոց Ցեղասպանութիւնը ճանչցող բանաձեւը այս հանգրուանին վաւերացնել՝ ի պատասխան Սուրիոյ մէջ ամերիկեան զօրքերուն դէմ թրքական շարունակուող սպառնալիքներուն:
Լիու խստօրէն քննադատած է Աֆրինի մէջ Թուրքիոյ սանձազերծած ռազմական գործողութիւնը եւ ամերիկացիներ եւս հարուածելու թրքական յստակ սպառնալիքները՝ աւելցնելով. «Բոլորս գիտենք, որ Հայոց Ցեղասպանութիւնը տեղի ունեցած է: Ատիկա պատմական իրողութի՛ւն է, եւ միակ պատճառը, որ այդ բանաձեւը չի վաւերացուիր, ա՛յն է, որ մենք կը փափաքինք պահպանել Թուրքիոյ հետ մեր յարաբերութիւնները: Հիմա իսկական պահն է այդ բանաձեւը վաւերացնելու եւ Թուրքիոյ ըսելու՝ «Եթէ դուն մեր նկատմամբ նման գործողութիւններ կատարես, ապա մենք ճշմարտութիւնը պիտի խօսինք եւ պիտի ընենք այնպիսի բաներ, որոնք բոլորովին հաճելի պիտի չթուին քեզի»»: