ԱՆԳԱՐԱ, «Նորտիք Մոնիթըր»․- Թուրքիոյ կառավարութիւնը որոշ ոլորտներու մէջ կը սկսի «հանրային դիւանագիտութեան» արշաւի` ուղղուած Թուրքիոյ «խարխլած վարկի բարելաւման»:
Թուրքիոյ նախագահ Էրտողանի կից հասարակութեան հետ կապերու գրասենեակը հրապարակեց «Հանրային դիւանագիտութեան ազգային ռազմավարութիւն»ը եւ «Գործողութիւններու ծրագիր»ը` ուղղուած 2021-2023 թուականներուն սեւ քարոզչութեան դէմ պայքարին եւ «Թուրքիա» ապրանքանիշի ամրապնդման:
Ըստ ծրագիրին՝ պիտի ձեւաւորուին 26 նոր յանձնախումբեր եւ 16 աշխատանքային խումբեր, որոնք պիտի կեդրոնանան այդ հարցերուն վրայ, որոնցմով վերջին տարիներուն կը զբաղի Թուրքիան:
Ստեղծուելիք յանձնախումբերէն մէկը պիտի զբաղի «1915 թուականի իրադարձութիւններով եւ անհիմն պահանջներու դէմ պայքարով»: Միացեալ Նահանգներու նախագահին կողմէ Հայոց Ցեղասպանութեան պաշտօնական ճանաչումը ցոյց տուաւ, որ Թուրքիա վերջապէս չէ յաջողած կանխարգիլել զայն նախագահի մակարդակով: