Լիբանանցի քաղաքացիները, որոնք նախանցեալ օրուընէ սկսեալ հաց կը փնտռէին, երէկ շարունակեցին որոնումի այդ աշխատանքը, ինչ որ շահագործողները մղեց ստեղծելու նաեւ հացի վաճառքի սեւ շուկայ մը` մէկ կապ արաբական հացին սակը հասցնելով 30.000 լ. ոսկիի:
Աւելի ուշ տնտեսութեան եւ առեւտուրի նախարարութիւնը հրապարակեց արաբական հացի նոր սակացոյցը, որուն համաձայն` պզտիկ չափի հացի կապին (388 կրամ) սակը սղեցաւ 8000 լ. ոսկիի, միջակը (855 կրամ) դարձաւ 13.000 լ. ոսկի, իսկ մեծը` (1095 կրամ) դարձաւ 16.000 լ. ոսկի:
Նախարարութիւնը ընդգծեց, որ վառելանիւթի սակին սղաճը իր ուղղակի ազդեցութիւնը կ՛ունենայ ալիւրի արտադրութեան վրայ, ինչ որ իր կարգին կ՛ազդէ հացի պատրաստութեան ծախսերուն վրայ:
Նախարարութեան հաղորդագրութեան մէջ նշուեցաւ, որ այս բոլորին կողքին կայ նաեւ ցորենի արձանագրած սղաճը միջազգային առումով, որ հետեւանք է Ուքրանիոյ տագնապին:
Միւս կողմէ, վառելանիւթը իր կարգին արձանագրեց նոր սղաճ:
Ուժանիւթի եւ ջուրի հարցերու նախարարութեան հրապարակած նոր սակացոյցին համաձայն, 95 եւ 98 օքթան պենզինի թիթեղին սակը սղած է 17.000 լ. ոսկիով, մազութը` 65.000 լ. ոսկիով, իսկ պիւթակազը` 33.000 լ. ոսկիով:
Հետեւաբար 95 օքթան պենզինի թիթեղին սակն է 559.000 լ. ոսկի, 98 օքթան պենզինը` 569.000 լ. ոսկի, մազութը` 680.000 լ. ոսկի, իսկ պիւթակազը` 408.000 լ. ոսկի:
Նշենք, որ կառավարութիւնը այսօր կէսօրէ ետք ժամը 2:30-ին, Պաապտայի մէջ պիտի գումարէ իր վերջին նիստը` նախագահութեամբ հանրապետութեան նախագահ զօր. Միշել Աունի:
Կառավարութեան քննարկելիք օրակարգին վրայ գտնուող ամէնէն հրատապ հարցը պիտի ըլլայ հաղորդակցութեան միջոցներու թղթածրարը:
Այս իմաստով հաղորդակցութեան միջոցներու նախարար Ճոնի Քըրըմ երէկ յայտնեց, որ կառավարութեան գումարելիք նիստը վերջին առիթն է կասեցնելու հաղորդակցութեան միջոցներու մարզին փլուզումը:
«Հաղորդակցութեան միջոցներու մարզին փրկութիւնը պիտի ըլլայ «Օժերօ»-ին ընդմէջէն հաղորդակցութեան միջոցներուն սակին տրամաբանական բարձրացումի շեմ մը ճշդելով: Նոյնը պէտք է գործադրել նաեւ բջիջային հեռաձայնի եւ համացանցի ծառայութեան սակերուն պարագային», ըսաւ ան` աւելցնելով, որ իր առաջարկին նկատի չառնուելուն պարագային, պիտի ներկայացնէ իր հրաժարականը:
Քըրըմ յայտնեց, որ կառավարութեան որոշումով վերջ պիտի դրուի 2G-ի դրութեան, որպէսզի կարելի ըլլայ 42 միլիոն տոլար խնայել: