Շաբաթ երեկոյեան ՀԲԸՄ-ի Նիկոսիոյ ակումբին մէջ, տօնուեցաւ մասնաճիւղի հարիւրամեակը։ Ներկայ էր Կիպրահայոց Թեմի Կաթողիկոսական Փոխանորդ Տէր Նարեկ Արքեպիսկոպոս, Հայ Համայնքի Պետական Ներկայացուցիչ Վարդգէս Մահտեսեան, ինչպէս նաեւ համայնքէն ներս գործող՝ կազմակերպութիւններու ներկայացուցիչներ։ Այս մասին կը հաղորդէ artsakank.com.cy-ը:
Յայտագիրը կը պարունակէր բացման խօսք՝ Տիկին Մակի Էսկիճեանի կողմէ, գեղարուեստական յայտագիր, որ կը ներառէր խմբերգներ, նուագ եւ արտասանութիւն, ինչպէս նաեւ Տիկին Մակի Էսկիճեանի կողմէ ընթերցում՝ ՀԲԸՄ-ի նախագահ Պերճ Սեդրակեանի շնորհաւորական նամակի։
Ցուցադրուեցաւ նաեւ տեսանիւթ՝ որուն վերնագիրն էր, «ՀԲԸՄ-ի երկարամեայ համաշխարհային գործունէութիւն»ը, ինչպէս նաեւ՝ Նիկոսիոյ մասնաճիւղի նկարներու հաւաքածոյ մը։
Օրուայ բանախօսն էր «Խօսնակ» ամսագրի գլխաւոր խմբագիր, բանաստեղծ, արձակագիր, հրապարակախօս, հրապարակագիր Համբիկ Մարտիրոսեան, որ պատշաճ կերպով փոխանցեց օրուայ պատգամը։
Տեղի ունեցաւ նաեւ ՀԲԸՄ-ի Նիկոսիոյ մասնաճիւղի վեթերան անդամներու պատուոյ գիրի տուուչութիւն։
Յայտագիրը աւարտեց Միութեան ատենապետ Միսաք Գույումճեանի փակման խօսքով եւ Նարեկ Սրբազանի օրհնութեան խօսքով եւ Պահպանիչով։ Յաջորդեց ընդունելութիւն։