ՀՅԴ Լիբանանի Կեդրոնական կոմիտէի ներկայացուցիչ, երեսփոխան Յակոբ Բագրատունի բոլոր լիբանանցիներուն նման, երէկ` 15 մայիսին կատարեց իր քաղաքացիական պարտականութիւնը եւ քուէարկեց Զոքաք Պլաթի մէջ:
Օրուան ընթացքին ան շրջագայեցաւ ընտրական տարբեր կեդրոններ, ինչպէս նաեւ Դաշնակցութեան ակումբներ եւ ընտրական կէտեր:
«Ազդակ»-ի հետ ունեցած զրոյցին ընթացքին ան ըսաւ. «Անցնող երկու-երեք շաբաթներուն, երբ միշտ ժողովուրդին հետ կ՛ըլլայինք, կը տեսնէինք այն խանդավառութիւնը, որ ինչպէս անոնք այսօր` 15 մայիսին, պիտի քուէարկեն Դաշնակցութեան: Այսօր, երբ ընտրական կեդրոններն ու ակումբները կը շրջէի, տեսայ հարիւրաւոր երիտասարդներ, կիներ, երէցներ, որոնք արեւուն տակ, սպասելէն յոգնած, սակայն հաւատքով կը սպասէին, որպէսզի իրենց կարգը գայ, եւ քուէարկեն:
«Կը հաւատամ, որ նման ժողովուրդ ունեցող կուսակցութիւն մը միայն կրնայ յաղթել: Այս ընտրութիւններուն մասնակցիլը ամէն բանէ առաջ իրաւունք է, պարտաւորութիւն է` իբրեւ լիբանանցիներ, եւ անհրաժեշտ է, որ իւրաքանչիւր հայ քուէարկէ իր ձայնը լսելի դարձնելու, մանաւանդ ճշգրիտ ներկայացուցչութիւն ապահովելու համար»: