Սոյն թուականի փետրուարի 28-ից մարտի 8-ը Հայաստանում տեղի ունեցաւ ՀՅԴ 34-րդ Ընդհանուր ժողովը: Աշխարհի շուրջ 30 երկրներից ժամանած 100 պատուիրակները քննարկեցին եւ արժեւորեցին համահայկական կառոյցի հաշուետու ժամանակաշրջանի գործունէութիւնը, ուղենշեցին ՀՅԴ-ի յառաջիկայ քառամեակի ռազմավարութիւնը` որդեգրելով քաղաքական գործունէութեան առաջնահերթութիւններն ու հիմնական ուղղութիւնները:
Ժողովը արձանագրեց, որ.
. Ողջ հայութիւնը, Հայաստանի եւ Արցախի հանրապետութիւնները, յայտնուել են մեր նորագոյն պատմութեան ճակատագրական փուլերից մէկում, որն աննախադէպ սպառնալիքներ է ստեղծել Հայաստանի ինքնիշխանութեան եւ անվտանգութեան համար:
. Հայաստանի Հանրապետութեան իշխանութիւնների որդեգրած ապազգային քաղաքականութիւնը, արտաքին եւ ներքին ճակատներում առաջ եկած մարտահրաւէրներին անհամարժէք արձագանգն ու սխալ գործողութիւնները յանգեցրել են 44-օրեայ աղէտալի եւ կորստաբեր պատերազմի` Հայաստանի եւ Արցախի Հանրապետութիւնների համար ստեղծելով լինելիութեան վտանգ:
. Հայաստանի Հանրապետութեան իշխանութիւնները խորացրել են ներազգային պառակտումներն ու ջրբաժանները, որոնք ուղեկցւում են քաղաքական հետապնդումներով, բանտարկութիւններով եւ ճնշումներով: Փլուզուած է Հայաստանի անվտանգային ողջ համակարգը, կազմաքանդւում են պետական եւ ժողովրդավարական հաստատութիւնները:
. Սփիւռքը բազմաթիւ աշխարհաքաղաքական, տնտեսական, ընկերային պայմաններով թելադրուած, համազգային պառակտման եւ յատկապէս 44-օրեայ պատերազմում պարտութիւնից եւ յետպատերազմեան զարգացումներից յետոյ գտնւում է յուսալքութեան, ահռելի դժուարութիւններ յաղթահարելու եւ ելքերի փնտռտուքի փուլում, որն հարկ է հունաւորել ու արդիւնաւորել:
. Տարածաշրջանում աշխուժացել է թուրք-ազրպէյճանական դաշինքը, իսկ Հայաստանի իշխանութիւնները դադարել են լինել Արցախի Հանրապետութեան եւ արցախահայութեան անվտանգութեան երաշխաւորը:
ՀՅԴ 34-րդ Ընդհանուր ժողովը հաստատեց, որ.
. Ստեղծուած իրավիճակը եւ հայկական զոյգ պետութիւնների վտանգուած հեռանկարը հնարաւոր է բեկել հայ ժողովրդի վճռական կամքով, Հայաստան-սփիւռք-Արցախ եռամիասնական ներուժով:
. Հայութեան ներուժի, ազգային արժէքների նահանջի պայմաններում Դաշնակցութիւնը պարտաւոր է ստանձնել ազգային նպատակներ բանաձեւողի, ապազգային իշխանութիւններին երկրի ղեկավարումից հեռացնելու գործընթացի որոշիչ դերակատարութիւնը:
. Սփիւռքը իբրեւ գլխաւորաբար Հայոց ցեղասպանութեան ծնունդ, Արեւմտահայաստանի կորուստի արդիւնք եւ արեւմտահայերէնի պահպանման կռուան` ռազմավարական նշանակութիւն ունի հայութեան մղած պայքարի համար: Անհրաժեշտ է նոր աւիւն ներարկել սփիւռքի առաւել կազմակերպման եւ համահայկական քաղաքական նպատակների իրականացման պայքարին:
. Հայաստանի եւ Թուրքիայի միջեւ յարաբերութիւնների հնարաւոր հաստատումը չի կարող լինել ի հաշիւ Հայաստանի, Արցախի եւ համայն հայութեան օրինաւոր եւ անժամանցելի իրաւունքների:
. Արցախում ստեղծուած նոր կացութիւնը անհրաժեշտութիւն է առաջացնում պայքարի նոր մօտեցումների եւ ռազմավարութեան որդեգրման` մեկնակէտ ունենալով արցախահայութեան ինքնորոշման իրաւունքի լիարժէք իրացումը:
. ՀՅԴ-ն իր ողջ ներուժով, համահայկական կառոյցի կարողականութեամբ եւ նուիրումով ձեռնամուխ է լինելու Հայաստանի եւ Արցախի Հանրապետութիւնների անվտանգութեան, տարածքային ամբողջականութեան, ինքնիշխանութեան, կայունութեան ու զարգացման ապահովման եւ ժողովրդի կենսամակարդակի բարձրացման ու ընկերային արդարութեան հաստատման աշխատանքներին:
. ՀՅԴ-ն հաւատարիմ Հայ դատի պայքարին` հանդէս է գալու ցանկացած գործընթացի դէմ, որը կը հակասի 1990 թ. օգոստոսի 23-ին ընդունուած Հայաստանի Հանրապետութեան Անկախութեան եւ Հայոց ցեղասպանութեան 100-րդ տարելիցին հրապարակուած Համահայկական հռչակագրերին:
. Ապազգային քաղաքականութիւն վարող եւ երկրին ծանր կորուստների բերած իշխանութիւնների հեռացումը առաջնահերթ օրակարգ է եւ կուսակցութիւնը շարունակելու է ընդլայնել հունաւորուող ազգային դիմադրութեան շարժումը:
ՀՅԴ-ն իր համահայկական կառոյցով եւ համակիրների աջակցութեամբ վճռական է իրականացնելու որդեգրած ուղեգիծն ու ռազմավարութիւնը:
ՀՅԴ 34-ՐԴ ԸՆԴՀԱՆՈՒՐ ԺՈՂՈՎ
8 մարտ 2022