Յառաջիկայ աշնան Լիբանան ժամադրուած է իրագործելու իր կարեւորագոյն ժամկէտներէն նախագահական ընտրութիւնը: Արդէն իսկ այս գծով նախագահական թեկնածուներու «ցանկը» օր ըստ օրէ կը բացայայտուի, եւ այս մասին թափ կ՛առնեն սահմանադրական տրամադրութիւնները` արծարծուող իւրաքանչիւր թեկնածուի «ատակութեան եւ իրաւասութեան» գծով նախ` սահմանադրական տրամաբանութեամբ: Սակայն նախքան այդ մտավախութիւններ կը ծագին նշեալ իրագործումը յաջողցնելու կոչուած` կառավարութեան կազմութեան հարցով: Ըստ կարգ մը աղբիւրներու, վարչապետի նշանակումը կատարուեցաւ, սակայն կառավարութեան կազմութիւնը կրնայ «երկարիլ» ու առկախուիլ, ինչ որ կրնայ արգելակել նոր նախագահի ընտրութեան հեզասահ ընթացքը եւ սահմանադրական տագնապ ստեղծել: Փաստօրէն, նախագահ Միշել Աուն, որ յաճախակիօրէն կը յայտարարէ, թէ վճռած է իր պաշտօնավարութեան աւարտին հեռանալ Պաապտայի պալատէն, այսուհանդերձ Պաապտայի պալատի մօտիկ աղբիւրներու կարծիքով` նախագահ Աուն պիտի խուսափի աթոռը «թափուր» պահել ու կանխարգիլելով երկրի իշխանութեան «ղեկը» հրաժարեալ կառավարութեան յանձնել` կառչած պիտի մնայ «իր աթոռին»: Այս հարցը արդէն իսկ խնդրայարոյց բանավէճի նիւթ դարձաւ վերջերս վարչապետ Նեժիպ Միքաթիի եւ նախկին նախարար Ժպրան Պասիլի միջեւ, որ թուիթըրեան գրառումով մը քննադատեց կառավարութեան կազմութեան ձգձգումը` նշելով, որ «կառավարութիւնը օդանաւին եւ զբօսանաւուն մէջ չի կազմուիր, այլ` նախագահին եւ վարչապետին միջեւ խորհրդակցաբար»: Իր կարգին, վարչապետ Միքաթիի գրասենեակը հակադարձեց` հերքելով վարչապետին վերագրուած քայլերը եւ թելադրելով նկատի ունենալ միայն իր գրասենեակին հրապարակած տեղեկութիւնները եւ ոչ թէ «վարչապետի մօտիկ աղբիւրներ» վերագրումը:
Այս հարցը տակաւին «շատ ջուր կը վերցնէ» Լիբանանը «ողողած» դիւանագիտական, ապրուստի կենցաղային թէ քաղաքական հրատապ այլ հարցերու խճանկարին մէջ: Արդարեւ, կը նախատեսուի, որ յառաջիկայ երկու ամիսներուն ընթացք առնէ հարաւ «Քարիշ» նաւթահորին հորատման աշխատանքը, որուն գծով պատկան կողմեր ամերիկեան բանագնացի միջնորդութեամբ կը փորձեն հարթել ջրային սահմանագծումի թնճուկը, մինչ Լիբանան վճռական է իր ջրային սահմաններու իրաւասութեան պահպանման գծով: Այս գծով ուշագրաւ էր երէկ ամերիկացի դեսպան Տորըթի Շիայի այն յայտարարութիւնը, թէ «Պէտք է առիթ տալ այս բանակցութեանց, որ յաջողին` ընդգծելով, որ Լիբանան մեծապէս կրնայ օգտուիլ իր ջրային պաշարներէն»:
Նաեւ` Նասրալլա
Նմանապէս, ջրային սահմանագծումի այս հարցը արծարծեց նաեւ Հըզպալլայի ընդհանուր քարտուղար սէյիտ Հասան Նասրալլա, որ երէկ երեկոյեան Յուլիսեան պատերազմի 16-ամեակին առիթով պատկերասփռուած իր «խօսք-ին մէջ պատգամ ուղղեց ամերիկեան կողմին, աւելի քան իսրայէլեան: Արդարեւ, Նասրալլայի խօսքին թուականը կը զուգադիպէր Միացեալ Նահանգներու նախագահ Ճօ Պայտըն Միջին Արեւելք կատարած շրջապտոյտին, ուր ան նախ եւ առաջ այցելեց Իսրայէլ` խորհրդակցութիւններ ունենալու իսրայէլացի եւ պաղեստինցի պատասխանատուներու հետ, ապա` ուղղուելու դէպի Սէուտական Արաբիա: Նասրալլա իր խօսքին մէջ շեշտեց Լիբանանի կայունութեան կարեւորութիւնը` իբրեւ ազդակ շրջանի կայունութեան: Ան նաեւ անհրաժեշտ նկատեց ջրային սահմանագծումի այս «թղթածրարը» ամբողջացնել նախքան յառաջիկայ սեպտեմբերի աւարտը, որ «կարեւոր ժամկէտ եւ ոսկի առիթ կը նկատուի ի նպաստ Լիբանանի իրագործում արձանագրելու»: Նասրալլա սպառնաց «Քարիշ» եւ «աւելի հեռուն հասնելու» ի պահանջել հարկին: Ան յիշեցուց երեք անօդաչու սարքերու «Քարիշ» «այցելութիւնը», որ «իր տեսակին մէջ աննախընթաց էր»: «Այսօրուան Ամերիկան նոյնը չէ, ինչ որ էր 2003-ին կամ 2006-ին», ընդգծեց Նասրալլա` նշելով, որ ամերիկեան ազդեցութիւնը տկարացած է շրջանին մէջ:
Սուրիացի Տեղահանուածներու Թղթածրարը
Լիբանանցի վարիչներուն համար մէկ այլ հրատապ հարց է սուրիացի տեղահանուածներու պարագան. լիբանանեան պատկան կողմեր կը ջանան աւելի քան մէկուկէս միլիոն հաշուող սուրիացիներու տունդարձը իրականացնել` տրուած ըլլալով, որ անոնց Լիբանան ապաստանելու շարժառիթ նկատուող պատերազմական գործողութիւնները զգալիօրէն մեղմացած են Սուրիոյ մէջ: Այս առնչութեամբ նախագահ Միշել Աուն Լիբանանի վճռական կեցուածքը ներկայացուց Սուրիոյ մօտ ՄԱԿ-ի նոր նշանակուած ներկայացուցիչ Նաժաթ Ռուշտիին, այս վերջինին տուած հրաժեշտի այցելութեան առիթով: Նախագահ Աուն շնորհաւորելով Ռուշտիի նոր պաշտօնը վերահաստատեց Լիբանանի կեցուածքը` սուրիացի գաղթականներու տունդարձի անհրաժեշտութեան գծով, որոնց ներկայութիւնը տնտեսական եւ ընկերային ծանր հետեւանքներ կ՛ունենայ եւ կը սպառնայ Լիբանանի ժողովրդագրական պատկերին:
Միւս կողմէ, նախագահ Աուն երէկ Հարաւի մէջ տեղակայուած ՖԻՆԻՒԼ-ի միջազգային խաղաղապահ ուժերու ընդհանուր հրամանատար զօրավար Արոլօ Լազարոն ընդունելով իր ընդվզումը արտայայտեց Իսրայէլի յաճախակի ոտնձգութեանց գծով լիբանանեան սահմաններէն ներս` նշելով, որ այս ընթացքով Լիբանան կրնայ բողոքի յուշագիր յղել ՄԱԿ-ի պատկան կողմերուն: Նմանապէս նախագահ Աուն Ֆրանսայի դեսպան Անն Կրիոյի հետ քննեց օրուան հրատապ հարցերը եւ այս գծով Ֆրանսայի օժանդակութեան ու զօրակցութեան կարեւորութիւնը:
Նաեւ` Ապրուստի Եւ Կենցաղային Հարցերու Գծով
Քաղաքական ու ապահովական այս մթնոլորտին մէջ լիբանանցիք կը շարունակեն տառապիլ կենցաղային տարրական պէտքերու ապահովման տագնապէն: Արդարեւ, երէկ զանազան շրջաններու մէջ շարունակուեցաւ երկար շարքերու երեւոյթը` կապ մը հաց «ձեռք ձգելու» համար: Ըստ «Ռոյթըրզ» լրատու գործակալութեան, մօտերս Լիբանան 35 հազար թոն ցորեն պիտի ստանայ Ուքրանիայէն եւ Ռուսիայէն, ինչ որ կրնայ մեղմացնել հացի այս տագնապը: Նոյն ծիրին մէջ, լիբանանցի պատկան պատասխանատու մը հաւաստեց, թէ այսօր կրնայ «վերանալ» հացի տագնապը գէթ 15 օրով, ցնոր դասաւորում:
Այլ ծիրի մէջ ներքին գործոց նախարարի պաշտօնակատար Պասսամ Մաուլաուի եւ Ճարտարարուեստի նախարարի պաշտօնակատար Ճորճ Պուչիքեան եւ առնչակից այլ պատասխանատուներ, այսօր աշխատանքային նիստ մը պիտի գումարեն` քննելու համար զանազան շրջաններուն մէջ յաճախակիօրէն կրկնուող պատահական թէ դիտաւորեալ հրդեհներու ծագման երեւոյթը: Նաեւ պիտի քննարկուին Պէյրութի նաւահանգիստի ցորենի շտեմարանին շուրջ ծագած ու դեռ եւս շարունակուող հրդեհը մարելու գործնական քայլերը: Նշենք, որ այս գծով Պէյրութի նաւահանգիստի պայթումի զոհերու ընտանեկան պարագաներ երէկ բողոքի ցոյց կազմակերպեցին` պահանջելով անյապաղ մարել այդ հրդեհը, որ «կը սպառնայ ընդմիշտ վերացնել իրենց հարազատներու ողբերգութեան վկայութիւնները»: