https://www.azatutyun.am
Այսօր ողջ օրը մարտական գործողությունները շարունակվել են ռազմաճակատի ողջ երկայնքով, բայց ոչ մեծ ինտենսիվությամբ, տեղեկացնում է Հայաստանի պաշտպանության նախարարության ներկայացուցիչ Արծրուն Հովհաննիսյանը:
«Հարավային հատվածում` Բերձորից մինչև Արաքսի ափն ընկած ռազմաճակատային բնագծի ուղղությամբ եղել են որոշակի մարտական գործողություններ, հայկական զինված ուժերին հաջողվել է որոշակի դիրքային բարելավումներ իրականացնել:
Մարտունու և Ասկերանի շրջանների գյուղերում` անտառային զանգվածի փոքր բնակավայրերի հարակից տարածքներում շարունակվում են դիվերսիոն խմբերի դեմ մարտական գործողությունները», – ասուլիսի ժամանակ մանրամասնեց ՊՆ ներկայացուցիչը` հավելելով, որ շարունակվել են Արցախի բնակավայրերի հրետակոծությունները:
Սեփական բնակավայրերին ուղղված հարվածների մասին իր հերթին հայտարարել էր նաև ադրբեջանական կողմը:
«Ազատության» հարցին, թե Արցախի նախագահը հայտարարեց, որ Շուշիից առավելագույնը 5 կիլոմետր հեռավորության վրա են, խոսքը արդյոք դիվերսիոն խմբերի մասին է, և ո՞ր ուղղությամբ են մոտեցել, ՊՆ ներկայացուցիչը պատասխանեց. – «Խոսքը Սղնախ գյուղի և հարակից գյուղերի մասին է, որը միգուցե 5 չէ, 7, բայց մոտավորապես այդպիսի հեռավորության վրա է:
Արցախի նախագահը, ըստ էության, մարտակոչ է հնչեցրել, և դա նորմալ է. նման իրավիճակում երկրի ղեկավարները, ռազմաքաղաքական ղեկավարները, զինված ուժերի հրամանատրները, որպես կանոն, ամեն օր էլ կարող են մարտակոչեր հնչեցնել, որովհետև մարտական գործողություններն ընթանում են, շարունակվում է պատերազմը: Դիվերսիոն խմբերը, փոքր խմբերը մանավանդ այսպիսի տեղանքում փորձելու են ինչ-որ բաներ իրականացնել, և ամեն օր որոշակի գործողություններ կան: Այս ուղղությունը, որի մասին բարձրաձայնվել է, հասկանալի է, որ դեպի Շուշի գնացող գյուղերի պարագիծն է, դրանով է ինքը շատ կարևոր, բայց մեր մարտերը շարունակվում են ամենուր»: