Հրդեհներու հսկայ ալիք մը նախանցեալ գիշեր հարուածեց հարաւային Լիբանանի անտառները:
Բռնկած հրդեհներուն պատճառով հրկիզուեցան Մանսուրիի, Արեւմտեան Սիրի, Զրարիէի եւ Թայրֆըլսէի անտառները:
Երէկ առաւօտեան վերոնշեալ շրջաններուն մէջ բռնկած հրդեհները աւելի եւս սաստկացան եւ անոնց բոցերը հասան մինչեւ Նապաթիէի, Շուքինի, Զըպտինի, Անսարի, Քաուսարիեթ Ռըզի, եւ Քֆարսիրի անտառները:
Հրդեհները մարելու համար քաղաքացիական պաշտպանութեան ուժերը, ՖԻՆԻՒԼ-ի ուժերը, լիբանանեան բանակն ու ապահովութեան ուժերը աշխատանքի լծուեցան` օգտագործելով իրենց հրշէջ ուժերն ու ուղղաթիռները, որոնք ամէն ջանք ի գործ դրին հակակշիռի տակ առնելու հրդեհները:
Երէկ յետմիջօրէին հրդեհներ բռնկեցան նաեւ Պէյթ Մերիի, Մոնթեվերտիի, Պաքաաթայի եւ Աշքութի անտառներուն մէջ:
Պէյթ Մերիի քաղաքապետարանը յետմիջօրէին ահազանգ հնչեցուց` հաստատելով, որ ջուրի իրենց կարիքը շեշտուած է` կոչ ուղղելով բոլորին ջուր հասցնելու շրջան, որպէսզի կարելի ըլլայ հրդեհը հակակշիռի տակ առնել:
Ներքին գործոց նախարար Պասսամ Մաուլաուի հետեւեցաւ եւ ցուցմունքները տուաւ տարբեր շրջաններուն մէջ հրդեհները մարելու աշխատանքին:
Վարչապետ Նեժիպ Միքաթի հրդեհները հակակշիռի տակ առնելու աշխատանքներուն հետեւեցաւ ներքին գործոց նախարարին հետ եւ բանակէն ու ապահովական կառոյցներէն պահանջեց կազմ ու պատրաստ ըլլալ:
Անդրադառնալով հրդեհներուն` խորհրդարանի նախագահ Նեպիհ Պըրրի ըսաւ. «Ամէնէն վտանգաւոր հրդեհները, որոնք կարելի չէ մարել` հոգիներուն մէջ բռնկած համայնքային եւ յարանուանական հրդեհներն են»:
Հզօր Լիբանան համախմբումի երեսփոխան Իպրահիմ Քանաան կոչ ուղղեց ձերբակալելու եւ պատժելու այն ոճրագործները, որոնք հրդեհներ կը բռնկեցնեն Լիբանանի անտառներուն մէջ:
Ան զօրակցութիւն յայտնեց հրշէջներուն եւ Քաղաքացիական անվտանգութեան ուժերուն, որոնք կը պայքարին մարելու համար հրդեհները եւ փրկելու համար քաղաքայիններուն կեանքերը:
Հաւատարմութիւն դիմադրութեան պլոքի երեսփոխան Հասան Իզզէտտին կոչ ուղղեց հարաւային Լիբանանի գիւղաքաղաքներուն մէջ բռնկած հրդեհներուն մասին հետաքննութիւն բանալու:
Իր կարգին, Ազատագրում եւ բարգաւաճում պլոքի երեսփոխան Ինայա Իզզէտտին անհրաժեշտ նկատեց անմիջապէս հատուցել հրդեհներէն տուժածները, արդար հատուցում կատարել քաղաքացիական պաշտպանութեան ուժերուն մաս կազմող կամաւորներուն եւ անտառներու պաշտպանութեան պատասխանատուներ նշանակել: