ԵՐԵՒԱՆ.- Հայաստանի մարմնամարզի եւ երիտասարդութեան հարցերու նախարարութիւնը կը տեղեկացնէ, որ Միացեալ Նահանգներ բնակող ողիմպիական ախոյեան, ծանրորդ Եուրի Վարդանեան մահացած է: Մահուան պատճառները տակաւին յայտնի չեն:
Եուրի Վարդանեան ծնած էր 1956ին: 1977ին ստացած էր ԽՍՀՄ սպորտի վաստակաւոր վարպետի կոչում: 1980ին աւարտած էր Լենինականի Մանկավարժական հիմնարկը: 1977-1979, 1980-1981, 1983 եւ 1985 ան դարձած էր աշխարհի ախոյեան եւ փաժակակիր, 1980ին՝ ողիմպիական ախոյեան, 1977-1978, 1980-1981 եւ1983 թուականներուն Եւրոպայի ախոյեան եւ փաժակակիր, իսկ 1977, 1979, 1981 թուականներուն՝ ԽՍՀՄ ախոյեան եւ 1976ին փաժակակիր: 1978-1981 թուականներուն ան ճանչցուած էր իբրեւ աշխարհի լաւագոյն ծանրորդ: 1985ին ան սահմանած էր աշխարհի 43 մրցանիշ:
2009ին ան նշանակուած էր Հայաստանի նախագահի խորհրդական: 8 Մայիս 2013ին ազատուած էր նախագահի խորհրդականի պաշտօնէն եւ նշանակուած Հայաստանի մարմնամարզի եւ երիտասարդութեան հարցերու նախարար: 2014ին՝ նախագահին հրամանագիրով նշանակուած էր Վրաստանի մօտ Հայաստանի Հանրապետութեան արտակարգ եւ լիազօր դեսպան: