Կիրակի, 12 Դեկտեմբեր 2021-ին, Քուէյթի եւ Շրջակայից Հայոց Թեմիս Կաթողիկոսական Փոխանորդ Հոգշ. Տ. Պետրոս Վրդ. Մանուէլեան, գաղութիս Հոգեւոր Հովիւ Արժ. Տ. Արտակ Ա. Քհնյ. Քէհեաեան եւ Արաբական Ծոցի Աստուածաշունչի Ընկերութեան ընդհանուր քարտուղար Տօքթ. Հրայր Ճէպէճեան այցելեցին Քուէյթի Ազգային Վարժարան, ուր դիմաւորուեցան Վարժարանի տնօրէն Տօքթ. Ներսէս Սարգիսեանի կողմէ:
Այցելութեան ընթացքին Տօքթ. Ճէպէճեան բոլոր դասարանները շրջագայելով եւ աշակերտներուն հետ զրուցելով՝ որպէս նուէր անոնցմէ իւրաքանչիւրին յանձնեց Արաբական Ծոցի Աստուածաշունչի Ընկերութեան հայերէն նոր հրատարակութիւնը՝ «Մանուկներու Բացատրական Աստուածաշունչ»ը, որուն հեղինակներն են Սուզըն Ճաշ, Քրիսթինա Շնըրլ, իսկ պատկերազարդողը՝ Մաթիաս Ուէպըր:
6-էն 12 տարեկան փոքրիկ ընթերցողներու միտքերուն մէջ ծագած կեանքի մեծ հարցումներուն ճիշդ պատասխաններ տալու նպատակով լոյս տեսած այս գիրքը նախ հրատարակուած է Գերմանիոյ Աստուածաշունչի ընկերութեան կողմէ: գիրքը 120 էջերու մէջ երեք մասերով` «Դուն», «Դուն եւ ուրիշները», եւ «Դուն եւ աշխարհը» վերնագիրներու տակ կը ներկայացնէ Աստուածաշունչէն հատուածներ եւ հարցումներուն պատասխանները:
Երկար ուսումնասիրութեանց արդիւնքը հանդիսացող այս գիրքը, անշուշտ, պիտի հարստացնէ Քուէյթի Ազգային Վարժարանի աշակերտներուն փոքրիկ գրադարանները եւ ընթերցանութեան հաճելի եւ օգտակար ժամեր պիտի պարգեւէ անոնց: