ԵՐԵՒԱՆ.– Մատենադարանի ֆոնտը համալրուած է գրչագիր մատեաններով եւ հնատիպ գիրքերով: Պոսթընաբնակ Ղրտեան ընտանիքի նուիրատուութիւնը հին ձեռագիրերու գիտահետազօտական հաստատութիւնը հարստացուցած է բացառիկ նմոյշներով: Վերջին տարիներուն եղած նման նուիրատուութիւններու շնորհիւ է, որ Մատենադարանը ձեռք բերած է իր ձեռագիրներուն մեծ մասը:
Ղրտեան Մարիան կը պատմէ, որ եղբայրը՝ Ռուբէնը, բժիշկ էր եւ հանգստեան օրերուն կ՛երթար հեռաւոր գիւղերու գրախանութներ, ուր հին գիրքեր կը վաճառուէին:
«Ժամերով կը պրպտէր գիրքերը, ուր որ Հայաստանի, հայերու կամ հայ մշակոյթի մասին էջ մը գրուած ըլլար, այս մէկ էջին համար 4 հատորը կը գնէր ու կը բերէր տուն», ըսած է ան:
Ղրտեան ընտանիքը հարուստ եւ բազմալեզու գրադարան ունի, բայց Ռուբէնին գիրքերը, ըստ անոր քրոջ՝ անձեռնմխելի էին: Աղօթագիրքերը երբեմն կու տար մօրը՝ կարդալու, յետոյ խնամքով կը զետեղէր դարակին մէջ: Ռուբէնի երազը եղած է, որ անոնք իրենց վերջին «հանգիստ»ը գտնեն հայրենիքի մէջ՝ Մատենադարանի երդիքին տակ, ուր, վստահ էր, որ գիրքերը աւելի լաւ ձեւով պիտի պահպանուին, քան տան մէջ։
«Ղրտեան ընտանիքը Մատենադարանին նուիրում է 5 ձեռագիր, մի քանի տասնեակ հնատիպ գրքեր, որոնք բացառիկ են, եզակի արժէքներ, որովհետեւ ոչ մի գրադարանում չկան», յայտնած է Մատենադարանի տնօրէն Հրաչեայ Թամրազեանը: