Երէկ` երկուշաբթի, 6 ապրիլ 2020-ին իր մահկանացուն կնքեց սփիւռքահայ եւ ֆրանսական աստղագիտութեան կարեւոր դէմքերէն Յակոբ Թերզան:
Ան ծնած է 1927-ին, Պոլիս: Աւարտած է Պոլսոյ համալսարանը (1945-ին ուսողութիւն, 1949-ին աստղագիտութեան մագիստրոս) եւ իբրեւ ուսողութեան ուսուցիչ աշխատած է Պոլսոյ Կեդրոնական վարժարանին մէջ: 1956-ին տեղափոխուած է Ֆրանսա: 1967-1998-ին աշխատած է Լիոնի աստղադիտարանին մէջ, 1982-1983-ին եղած է այդ աստղադիտարանի տնօրէնի տեղակալը: 1965-ին Լիոնի համալսարանին կողմէ արժանացած է ուսողութեան գիտութիւններու դոկտորի, 1980-ին` փրոֆեսէօրի կոչման:
Թերզանի յայտնաբերած եւ անոր անունով կոչուող աստղակոյտերը յայտնի են բոլոր աստղագէտներուն: Ան իր բազմամեայ գործունէութեամբ եւ կարեւոր արդիւնքներով լուրջ աւանդ ունեցած է դիտողական աստղագիտութեան մէջ:
Արժանացած է բազմաթիւ պարգեւներու եւ կոչումներու: