Տնտեսական խորհուրդները երէկ երեկոյեան ժամը 6:00-ին չեղեալ նկատեցին իրենց յայտարարած եռօրեայ ընդհանուր գործադուլը, որ պիտի սկսէր այսօր եւ շարունակուէր մինչեւ շաբաթ, 30 նոյեմբեր:
Աշխատաւորներու ընդհանուր համադաշնակցութիւնը երէկ յայտնեց, որ Տնտեսական խորհուրդներուն կատարելիք եռօրեայ գործադուլը կը նպաստէ լիբանանեան ազգային տնտեսութիւնը հարուածելու` աւելցնելով, որ ճարտարարուեստի մարզին ներառումը նման գործադուլի մէջ կը հարուածէ Լիբանանի ճարտարարուեստը:
Աւելի ուշ, Դրամատուներու միութեան խորհուրդը եւ կրթութեան նախարարութեան աղբիւրներ յայտնեցին, որ իրենք պիտի չմասնակցին Տնտեսական խորհուրդներուն յայտարարած եռօրեայ գործադուլին: Հետեւաբար դրամատուներուն եւ դպրոցներուն դռները կը մնան բաց:
Միւս կողմէ, սակայն, Վառելանիւթի կայարաններու սեփականատէրերու սենտիքան երէկ յայտարարեց, որ այսօր առաւօտեան պիտի սկսի բաց գործադուլի մը` ամբողջ Լիբանանի տարածքին, նկատի ունենալով մարզին արձանագրած վնասները` լիբանանեան դրամանիշի եւ ամերիկեան տոլարի արժէքին տարբերութեան պատճառով:
«Շատ համբերած ենք` նախքան այս լուրջ քայլին դիմելը: Հանրապետութեան նախագահ զօր. Միշել Աունի հետ հանդիպումի կարելիութեան մասին երկար սպասումէ ետք, հասած ենք այն եզրակացութեան, թէ ան մեզի հետ չի փափաքիր տեսակցիլ, իսկ հրաժարեալ վարչապետ Սաատ Հարիրիի տուած խոստումներէն ոչ մէկը գործադրուած է: Սենտիքան կանխաւ ներում կը հայցէ քաղաքացիներէն` անոնց կրելիք վնասներուն համար, սակայն ի՛նչ ալ ըլլան անոնց վնասները, մեր կրած վնասներուն պիտի չհասնին», նշուեցաւ սենտիքային հրապարակած հաղորդագրութեան մէջ: