Նախագահութեամբ վարչապետ Նեժիպ Միքաթիի, կառավարութիւնը երէկ առաւօտեան գումարուած նիստի մը ընթացքին շարունակեց 2022-ի պետական ամավարկի օրինագիծի քննարկումը, որ պիտի շարունակուի դարձեալ այսօր` առաւօտեան ժամը 9:00-ին:
Նախքան նիստին գումարումը, վարչապետ Միքաթի ընդունեց Լիբանանի մէջ Ֆրանսայի դեսպան Անն Կրիոն, որուն հետ քննարկեց լիբանանեան իրադարձութիւնները:
Հանդիպումէն ետք Կրիօ մեկնեցաւ մերժելով մեկնաբանութիւն կատարել:
Կառավարութեան նիստէն ետք, Միքաթի վարչապետարանին մէջ ընդունեց հանրապետութեան նախագահ շէյխ Ապտել Լաթիֆ Տըրիանը, որուն հետ քննարկեց լիբանանեան շարք մը հարցեր:
Դռնփակ հանդիպումէն ետք Միքաթիին եւ միւֆթի Տըրիանին միացաւ նաեւ առողջապահութեան նախարար Ֆիրաս Ապիատը:
Հանդիպումէն ետք Միքաթի ողջունեց հանրապետութեան միւֆթիին իմաստուն ու ազգային կեցուածքները, որոնց մասին ան կ՛արտայայտուի, յատկապէս այս զգայուն փուլին ընթացքին:
Միքաթի շեշտեց, որ Լիբանանին եւ լիբանանցիներուն դիմագրաւած մարտահրաւէրները նախ եւ առաջ ազգային միասնականութեան կարիք ունին` աւելցնելով, որ հանրապետութեան միւֆթին մեծ կարողութիւններ ունի բոլոր կողմերը համախմբելու իմաստով:
Իր կարգին, միւֆթի Տըրիան բարձր գնահատեց Միքաթիի դերակատարութիւնը եւ անոր ունեցած պատասխանատու դերակատարութիւնը:
«Տար Ֆաթուան բոլոր լիբանանցիներուն կը գուրգուրայ եւ չափաւորականութեան ու Լիբանանը բաղկացնող բոլոր շերտերուն բաց ըլլալու խորհրդանիշը կը նկատուի», ըսաւ միւֆթի Տըրիան:
Լրագրողներու հարցումներուն պատասխանելով վարչապետ Միքաթի յայտնեց, որ երեսփոխանական ընտրութիւններուն սիւննի համայնքին մասնակցութիւնը պոյքոթի պիտի չենթարկուի:
«Հետեւաբար, ո՛վ որ կը փափաքի թեկնածութիւն առաջադրել, պէտք է դիմէ այդ քայլին, իսկ երեսփոխանական ընտրութիւնները պիտի կատարուին սահմանադրութեամբ ճշդուած թուականին` 15 մայիս 2022-ին», շեշտեց վարչապետ Միքաթի:
Հանդիպումէն ետք վարչապետ Միքաթի եւ միւֆթի Տըրիան ուղղուեցան Կեդրոնական Պէյրութի Օմարի մզկիթ, ուր կատարեցին ուրբաթ օրուան նամազը:
Անոնց միացան նաեւ նախկին վարչապետ Ֆուատ Սինիորա, առողջապահութեան նախարար Ֆիրաս Ապիատ եւ կառավարութեան ընդհանուր քարտուղար, դատաւոր Մահմուտ Մաքքիէ: