Հանրապետութեան նախագահ զօր. Միշել Աուն երէկ առաւօտեան նախագահական պալատին մէջ ընդունեց վարչապետ Նեժիպ Միքաթին, որուն հետ քննարկեց լիբանանեան իրադարձութիւնները` արձանագրուած վերջին զարգացումներուն լոյսին տակ:
Նախագահն ու վարչապետը քննարկեցին նաեւ նախարարական յանձնախումբերուն գումարած նիստերուն արդիւնքները, ինչպէս նաեւ կատարուած նախապատրաստական աշխատանքը, որ պիտի ներկայացուի կառավարութեան յաջորդ նիստին ընթացքին:
Հանդիպումին ընթացքին քննարկուեցան նաեւ Լիբանանի եւ Ծոցի երկիրներուն միջեւ յարաբերութիւնները եւ զանոնք բարելաւելու իմաստով ի գործ դրուած ջանքերը:
Նախագահ Աուն եւ վարչապետ Միքաթի ընդգծեցին, որ Լիբանան յանձնառու կը մնայ իր եւ արաբական երկիրներուն, յատկապէս` Սէուտական Արաբիոյ եւ Ծոցի երկիրներուն միջեւ յարաբերութիւնները հեզասահ դարձնելու:
Հանդիպումէն ետք Միքաթի նախագահական պալատէն մեկնեցաւ մերժելով մեկնաբանութիւն կատարել:
Ան ուղղուեցաւ Աշխատաւորական ընդհանուր համադաշնակցութեան կեդրոնատեղի, ուր հանդիպում մը ունեցաւ համադաշնակցութեան նախագահ Պշարա Ասմարի հետ:
Հանդիպումէն ետք Միքաթի յայտնեց, որ Լիբանանի մէջ ամէն հարց իր լուծումը ունի` աւելցնելով, որ նախագահ Աունին յայտնած է, թէ մօտիկ ապագային կառավարութիւնը նիստի պիտի հրաւիրէ:
Միքաթի յայտնեց, որ ամէնէն կարիքաւոր ընտանիքներուն ցանկագրումը պիտի սկսի 1 դեկտեմբերէն` աւելցնելով, որ Լիբանանեան համալսարանի դասախօսները իրենց յայտարարած դասադուլին վերջ պիտի տան եւ պիտի սկսին համալսարանական կրթութեան տարեշրջանը:
Միւս կողմէ, Հըզպալլայի ընդհանուր քարտուղարի տեղակալ շէյխ Նայիմ Քասեմ յայտնեց, որ իրենք համաձայն են, որ նախարարաց խորհուրդը վերադառնայ իր ժողովներուն` այդ նիստերուն կասեցման տուն տուող պատճառներուն լուծում գտնելէ ետք: