Կառավարութեան կազմութեան ջանքերը շարունակելու շրջագիծին մէջ վարչապետ Նեժիպ Միքաթի երէկ կէսօրէ ետք ժամը շուրջ 4:00-ին այցելեց նախագահական պալատ, ուր հանդիպում մը ունեցաւ հանրապետութեան նախագահ զօր. Միշել Աունի հետ:
Շուրջ 40 վայրկեան տեւած հանդիպումէն ետք, վարչապետ Միքաթի մեկնեցաւ առանց մեկնաբանութիւն կատարելու եւ բաւարարուեցաւ ըսելով. «Աստուծմէ բարին, Աստուծմէ բարին»:
Միւս կողմէ, ընթացիկ հարցերու կառավարութեան տնտեսական հարցերու նախարարական յանձնախումբը երէկ նիստ մը գումարեց` նախագահութեամբ վարչապետի պաշտօնակատար Հասսան Տիապի:
Նիստին իբրեւ արդիւնք յայտարարուեցաւ, որ յառաջիկայ շաբաթասկիզբին մեկնարկը պիտի կատարուի հատուցման քարտի ելեկտրոնային հարթակին:
Նշենք, որ Արդարութեան գերագոյն խորհուրդի Պէյրութի նաւահանգիստի պայթումի հետաքննութեան պատասխանատու դատախազ Թարեք Պիթար վարչապետի պաշտօնակատար Հասսան Տիապի դէմ բերման գիր մը հրապարակեց եւ 20 սեպտեմբերը ճշդեց զայն հարցաքննելու թուական:
Միւս կողմէ, երէկ նախկին վարչապետները հանդիպում մը ունենալէ ետք յայտարարեցին, որ դատախազ Թարեք Պիթարի որոշումը անարգանք մըն է վարչապետութեան դիրքին դէմ: Անոնք նաեւ շեշտեցին, որ վարչապետի պաշտօնակատար Հասսան Տիապի դէմ Պիթարի որոշումը քաղաքական, ազգային եւ սահմանադրական բոլոր առումներով վտանգաւոր նախընթաց է: