Նիւ Եորքի մէջ ԵԱՀԿ-ի Մինսքի խմբակի համանախագահներ Իկոր Փոփովի (Ռուսիա), Սթեֆան Վիսքոնթիի (Ֆրանսա), Էնտրիւ Շոֆըրի եւ ԵԱՀԿ-ի գործող նախագահի անձնական ներկայացուցիչ Անճէյ Քասփրչիքի մասնակցութեամբ 23 սեպտեմբերին տեղի ունեցած է Հայաստանի եւ Ազրպէյճանի արտաքին գործոց նախարարներ Զոհրապ Մնացականեանի եւ Էլմար Մամետիարովի հանդիպումը:
Հայաստանի արտաքին գործոց նախարարութեան լրատուութեան եւ հանրային դիւանագիտութեան վարչութենէն «Արմէնփրես»-ին յայտնած են, որ զրուցակիցները քննարկած են Լեռնային Ղարաբաղի տագնապի խաղաղ լուծման հոլովոյթին առնչուող հարցերու շրջանակ եւ ներկայ իրավիճակի գնահատականը կատարած: Հայաստանի արտաքին գործոց նախարար Զոհրապ Մնացականեան բարձր գնահատած է ԵԱՀԿ-ի Մինսքի խմբակի համանախագահներու եւ ԵԱՀԿ-ի գործող նախագահի անձնական ներկայացուցիչի գործունէութիւնը:
Քննարկման ընթացքին հայկական կողմը կարեւոր նկատած է զինադուլի ամրապնդման եւ լարուածութեան նուազեցման ուղղութեամբ շարունակական ջանքերու գործադրումը` մասնաւորաբար համապատասխան մեքանիզմներու ներդրման եւ ամրապնդման միջոցով: Ընդգծուած է նաեւ վստահութեան մթնոլորտի ձեւաւորման ուղղութեամբ հետեւողական քայլերու անհրաժեշտութիւնը, ներառեալ` նախապէս ձեռք բերուած համաձայնութիւններու կեանքի կոչումը:
Ազրպէյճանի տարածքին մէջ կալանքի մէջ գտնուող Հայաստանի Հանրապետութեան քաղաքացիներուն առնչութեամբ` հայկական կողմը շեշտած է վերջիններուս հայրենադարձութեան ապահովման անհրաժեշտութիւնը:
Խաղաղ հոլովոյթի յառաջ մղման տեսանկիւնէն նախարար Մնացականեան կարեւոր նկատած է լուծման ծիրին մէջ կողմերուն ստանձնելիք յանձնառութիւններու համաչափութեան ապահովումը` վերահաստատելով հոլովոյթին մէջ Հայաստանի սկզբունքային դիրքորոշումը եւ մօտեցումները:
Կողմերը նախանշած են այս ուղղութեամբ հետագայ քայլերը, ներառեալ` համանախագահներու այցելութիւնը շրջան եւ մօտ օրերս արտաքին գործոց նախարարներու մակարդակով հերթական հանդիպման կայացումը: