Շաբաթ Օրուան Մրցումներուն Նկարագրութիւնը
Ֆութպոլի աշխարհի առաջնութեան 1/16-րդ փուլի առաջին ճակատումը տեղի ունեցաւ Հոլանտայի եւ Միացեալ Նահանգներու միջեւ: Առաջին կիսախաղի 10-րդ վայրկեանին Մեմֆիս Տեպայ յառաջ մղեց Հոլանտան: Այս կոլէն ետք Միացեալ Նահանգներ փորձեցին հաւասարեցնել հաշիւը: Սակայն հոլանտացիները կոլ մը եւս նշանակեցին մինչեւ կիսախաղ: Տէյլի Պլինտ կրկնապատկեց հաշիւը:
Երկրորդ կիսախաղին ամերիկացիները յարձակեցան: Հոլանտա պաշտպանութեան անցաւ` շեշտը դնելով հակայարձակումներու վրայ:
Միացեալ Նահանգներ 76-րդ վայրկեանին կրճատեցին տարբերութիւնը: Հոլանտա շատ արագ վերականգնեց երկու կոլի առաւելութիւնը: 81-րդ վայրկեանին Տենզել Տիւմֆրիս ամրագրեց Հոլանտայի յաղթանակը: Հոլանտա- Միացեալ Նահանգներ` 3-1:
Մրցումը տեղի ունեցաւ « Խալիֆա» միջազգային մարզադաշտին մէջ, 44.846 մարզասէրներու ներկայութեան:
1/4-րդ փուլին Հոլանտայի մրցակիցը պիտի ըլլայ Արժանթին:
Աշխարհի ախոյեանութեան 1/8-րդ փուլի երկրորդ մրցումը իրար դէմ հանեց Արժանթինը եւ Աւստրալիան:
Մրցումի առաջին վայրկեանէն աւստրալիացները պաշտպանութեան անցան: Նախաձեռնութիւնը բացայայտօրէն արժանթինցիներուն մօտ էր: 35-րդ վայրկեանին Լիոնել Մեսսի դիպուկ հարուածով նշանակեց Արժանթինի առաջին կոլը: Մեսսի մոնտիալներու ընթացքին կը նշանակէր իր 9-րդ կոլը` գերազանցելով Տիեկօ Մարատոնայի ցուցանիշը: Մեսսի նաեւ Աւստրալիոյ դէմ կը կատարէր իր ասպարէզին 1000-րդ մրցումը: Առաջին կիսախաղը աւարտեցաւ 1-0 արդիւնքով` Արժանթինի առաւելութեամբ:
Մրցումի 57-րդ վայրկեանին, օգտուելով Աւստրալիոյ բերդապահին կոպիտ սխալէն, Ալվարեզ կրկնապատկեց հաշիւը: Աւստրալիա 77-րդ վայրկեանին կրճատեց հաշիւը: Մրցումի յաւելեալ վայրկեաններուն Արժանթինի բերդապահ Էմիլիանօ Մարթինեզ ստոյգ կոլէ մը փրկեց իր բերդը: Մրցումը աւարտեցաւ 2-1 արդիւնքով Արժանթինի յաղթանակով:
Մրցումը տեղի ունեցաւ «Ահմետ Պըն Ալի» մարզադաշտին մէջ, 45.032 մարզասէրներու ներկայութեան:
Ինչպէս նշեցինք, քառորդ աւարտականին Արժանթինի մրցակիցը պիտի ըլլայ Հոլանտան: Հանդիպումը տեղի պիտի ունենայ 9 հոկտեմբերին:
Ֆրանսա – Լեհաստան 3- 1
Ժիրու Նոր Մրցանիշ Մը Հաստատեց.
Ֆրանսա Հասաւ 1/4-րդ Փուլ
Օլիվիէ Ժիրու մրցանշային` 52-րդ կոլը նշանակեց Լեհաստանի բերդին մէջ, դառնալով Ֆրանսայի ազգային խումբին պատմութեան ամէնէն շատ կոլ նշանակող ֆութպոլիստը: Ժիրուի կոլը եւ Ըմպափէի «տուպլ»-ը յաղթանակ մը պարգեւեցին Ֆրանսային` 3-1 արդիւնքով պարտութեան մատնելով Լեհաստանը (կիսախաղ` 1-0 ): Լեհաստան մրցումի վերջին վայրկեանին փենալթի հարուածով նշանակեց իր որբ կոլը, Ռոպերթ Լեւանտովսքիի միջոցով:
Մրցումը տեղի ունեցաւ «Թումամա» մարզադաշտին մէջ, 40.989 մարզասէրներու ներկայութեան:
Այսօրուան Մրցումներուն Յայտագիրը
Երկուշաբի, 5 Դեկտեմբեր 2022
Ճափոն ընդդէմ Խրուաթիա` ժամը 17:00
Պրազիլ ընդդէմ Հարաւային Քորէա` ժամը 21:00