Թուրքիոյ արտաքին գործոց նախարար Մեւլութ Չաւուշօղլու Անգարայի մէջ դիւանագէտներու խորհրդաժողովի աւարտին մամլոյ ասուլիսի մը ընթացքին յայտնեց, որ իր սուրիացի պաշտօնակից Ֆայսալ Մըքտատի հետ Պելկրատի մէջ Ոչ յանձնառու երկիրներու ժողովի ընթացքին իր հանդիպումին ընթացքին յայտնած է. «Պէտք է Սուրիոյ մէջ ընդդիմութիւնն ու վարչակարգը ձեւով մը հաշտեցնենք, այլապէս մնայուն խաղաղութիւն պիտի չըլլայ»:
«Ռուսիան կ՛ուզէ, որ սուրիական վարչակարգին հետ հաղորդակցութիւններ ունենանք, եւ ես Թուրքիոյ նախագահ Ռեճեփ Թայիփ Էրտողանի եւ Սուրիոյ նախագահ Պաշշար Ասատի միջեւ հանդիպում առաջարկեցի, եւ ատիկա ներկայիս բացառուած է», ըսաւ Չաւուշօղլու:
«Սուրիոյ` իր տագնապէն դուրս գալու միակ ուղին զայն մաքրելն է ահաբեկիչներէն, ինչ ալ ըլլայ անոնց անունը», յայտնեց թրքական դիւանագիտութեան պետը:
Չաւուշօղլու Հայաստանը Կը Յորդորէ
«Անկեղծ Ըլլալու»
«Թերթ» կը հաղորդէ, որ Չաւուշօղլու յայտարարած է. «Հայաստանի հետ յարաբերութիւններու կարգաւորման հոլովոյթը կը շարունակուի, որոշ քայլեր կատարուած են»:
«Այդ հոլովոյթը կը շարունակուի Ազրպէյճանի հետ համակարգուած: Հայաստանի մէջ ասիկա որոշակի մտահոգութիւն կը յառաջացնէ, սակայն մենք ժողովրդավարական երկիր ենք: Ինչքան ալ երկկողմանի ըլլայ կարգաւորման հոլովոյթը, մենք բոլորս պէտք է քայլերու ձեռնարկենք ամբողջ Հարաւային Կովկասի մէջ կայունութեան համար», ըսած է ան:
Չաւուշօղլու Հայաստանը յորդորած է չշեղելու, այս հարցին մէջ ըլլալու անկեղծ. «Մենք անկեղծ ենք, կը տեսնենք, որ Ազրպէյճանը եւս անկեղծ է»: