Լիբանան-Իսրայէլ ծովային սահմանագծումի ջանքերուն եւ լիբանանեան կողմին մօտ իրարու հակասող, սակայն «միացեալ» կոչուող կեցուածքի հանելուկին առընթեր, հինգշաբթի, 23 յունիս 2022-ին, նախագահական պալատին մէջ տեղի պիտի ունենան վարչապետի նշանակման պարտադիր խորհրդակցութիւնները:
Այս շրջագիծին մէջ, քաղաքական բազմաթիւ աղբիւրներ կը հաստատեն, որ վարչապետի պաշտօնակատար Նեժիպ Միքաթի դարձեալ պիտի նշանակուի վարչապետ` ստանալով խորհրդարանի մեծամասնութեան զօրակցութիւնը, իսկ ընդդիմութիւնը կը փորձէ համաձայնիլ այլ թեկնածուի մը շուրջ:
Բայց եւ այնպէս կան երեսփոխանական կարգ մը պլոքներ, որոնք հաստատեցին, որ պարտադիր խորհրդակցութիւններուն իրենց յայտնելիք կեցուածքը տակաւին անյստակ է:
Քաղաքական վստահելի աղբիւրներ հաստատեցին, որ Միքաթիի վերանշանակումէն ետք, վարչապետը կառավարութեան կազմութեան խորհրդակցութիւնները պիտի կատարէ բարձր առաստաղի ներքեւ եւ ամուր կեցուածքով, յատկապէս ինչ կը վերաբերի հանրապետութեան նախագահին պահանջներուն:
Միւս կողմէ, նախագահական պալատի աղբիւրներ կը հաստատեն, որ մինչեւ հինգշաբթի, 23 յունիս տրուած թուականը շատ կարեւոր կը նկատուի, որպէսզի երեսփոխանական պլոքները կարենան ճշդել վարչապետի իրենց թեկնածուն:
Նոյն աղբիւրները ընդգծեցին, որ հանրապետութեան նախագահ զօր. Միշել Աունի կողմէ խորհրդակցութիւններուն համար ճշդուած թուականին նպատակն է դրական մթնոլորտի մէջ կատարել այդ խորհրդակցութիւնները, ինչպէս նաեւ դիւրացնել նոր կառավարութեան կազմութեան հոլովոյթը: