Յովսէփ Նալպանտեան
«Լաւ հրապարակագիրը գիտակից այն անհատն է, որ միշտ ճշմարտութիւնը կը խուզարկէ, որ ընթերցողներուն տեղեակ կը պահէ ազգային, տեղական եւ համաշխարհային անցուդարձերուն: Ան կը պաշտպանէ արդարամիտ մամուլի շահերը: Ազգային–հասարակական խնդիրներու լուծման համար անաչառ է եւ հետապնդող: Կը մեկնաբանէ եղելութիւնները եւ կը ձգտի լաւին ու բարիին»: Յովսէփ Նալպանտեան «Կեանքի շարունակուող շաւիղներ» Լոս Անճ., 2015, էջ 6:
*Հայ մամուլին դերը շատ մեծ էր հայ ինքնութեան պահպանման մէջ… բայց ոչ վերջին 15 տարիները: Ամէն ինչ մեծապէս փոխուած է, եւ համեստօրէն կը կարծեմ, որ վերջին տարիները հայ մամուլը թերացած է ճիշդ եւ համակողմանի լուծումներ գտնելու:
*Մամուլը լեզու եւ մշակոյթ պահող եւ զարգացնող գործօն է: Բայց համացանցային նոր իրավիճակին մէջ փոխուած է, եւ կը նահանջենք այդ ուղղութեամբ եւս:
*Մամուլի մէջ բազմակարծութիւնը հիմնական լուրջ խնդիրներէն մէկն է, եթէ թերթը կուսակցական չէ, շատ յաճախ վերապահօրէն կը մօտենայ լուրջ ազգ. հարցերուն…կարեւոր է, որ մենք փոխուինք, ըսենք ամէն ինչ որ պէտք է, առանց ծայրայեղութեանց:
*խօսքի ազատութիւն չի նշանակեր սանձարձակութիւն, այլ անաչառ ըլլալ, ձեռքը դնել վէրքի վրայ, ճիշդը ըսել անկաշկանդ:
*Հայ մամուլի պէտք է կարծիք ձեւաւորէ, եթէ խմբագիրն ու աշխատակիցները այդ կարողութիւնը ունին, նոր որակ եւ մակարդակ փոխանցելու:
*Ընկերային այլազան ցանցերը շա՜տ բան փոխեցին վերջին մանաւանդ տասը տարին: Մենք կը կարծենք որ եթէ Լոսի մէջ թերթ մը փակուեցաւ, ուրեմն համացանցի վրայ կարդացողները շատցան… ոչ բացարձակապէս այդպէս չէ: Հայկական լաւագոյն համացանցի մամուլի ընթերցողներու թիւը երեք հազարը չ’անցնիր: Հարաւային Գալիֆորնիոյ մէջ վերջին 26 տարիներուն փակուած են 23 հայ մամուլ՝ օրաթերթ, շաբ., ամսագիր կամ պարբերաթերթ:
*Վերջին 7 ամիսներու Սփիւռքի նախարարութեան փակման «ուրախ» առիթով մենք շա՜տ բաներ կորսնցուցինք: Հայ մամուլը երբ մեծաքանակ կը նուազի, եւ երիտասարդ նախկին ընթերցողներ կը զզուին ի տես այս ցաւալի ազգ. անտարբերութեան…կը տուժենք բոլորս:
Յաջողութիւն բոլորիս՝
Յովսէփ Նալպանտեան, 18 Յունիս 2019 email address: [email protected]
Շնորհակալ եմ Տիկ. Շաքէ Մանկասարեանին, որու միջոցով և շատ համառօտ, իմ մտահոգութիւններս կը ներկայացնեմ: