ԱԹԷՆՔ, «Էյ.Փի.».- Յունաստանի վարչապետ Քիրիաքոս Միցոթաքիս յայտարարեց, որ Անգարայի եւ Լիպիոյ համախոհական կառավարութեան միջեւ անցեալ շաբաթ կնքուած զինուորական համագործակցութեան եւ ծովային սահմաններու շուրջ համաձայնութեան հարցը պիտի բարձրացնէ այս շաբաթ Լոնտոնի մէջ կայանալիք ՆԱԹՕ-ի վեհաժողովին ընթացքին։ «Դաշինքը չի կրնար անտարբեր մնալ, երբ իր անդամներէն մէկը կը խախտէ միջազգային օրէնքները եւ կը ջանայ վնասել այլ անդամի մը», յայտնեց Յունաստանի վարչապետը, որ քաղաքացիական պատերազմի մը կողմերէն մէկուն հետ նման քայլ մը վնասակար կը նկատէ:
Յիշեցնենք, որ Թուրքիոյ նախագահ Ռեչեփ Թայիփ Էրտողան Լիպիոյ համախոհական կառավարութեան վարչապետ Ֆայէզ Սարաճի հետ Պոլսոյ մէջ ստորագրած էր համաձայնագիրը, փորձելով արդարացնել Կիպրոսի ջուրերուն մէջ ուժանիւթի ապօրինի պեղումները, որոնք կը շարունակուին հակառակ դատապարտումի ալիքին:
Յունաստան անցեալ շաբաթ դժգոհութիւն յայտնած էր Թուրքիոյ կնքած համաձայնութեան նկատմամբ եւ յստակ տեղեկութիւններ պահանջելու համար արտաքին գործոց նախարարութիւն կանչած էր Աթէնքի մօտ Թուրքիոյ ու Լիպիոյ դեսպանները:
Յունաստանի մօտ Միացեալ Նահանգներու դեսպան Ճեֆրի Փիաթ եւս Երեքշաբթի օր յայտարարեց, որ Անգարայի ինքնագլուխ քայլը վնաս կը հասցնէ շրջանի կայունութեան։