ՀՅԴ Լիբանանի Կեդրոնական կոմիտէի եւ Հայկական երեսփոխանական պլոքի ներկայացուցիչ, երեսփոխան Յակոբ Բագրատունի երէկ առաւօտեան այցելեց ֆրանսական դեսպանատուն, ուր հանդիպում մը ունեցաւ Լիբանանի համար Ֆրանսայի նախագահ Էմանուել Մաքրոնի յատուկ պատուիրակ Ժան Իվ Լը Տըրիանի հետ:
Հանդիպումին ընթացքին քննարկուեցան հանրապետութեան նախագահի ընտրութեան գծով քաղաքական տարբեր ուժերուն հետ Լը Տըրիանի ունեցած հանդիպումներուն արդիւնքները:
Յ. Բագրատունիի եւ Լը Տըրիանի միջեւ հանդիպումը եղաւ դրական եւ արդիւնաւէտ: Անոնք ընդգծեցին լիբանանեան քաղաքական տարբեր ուժերուն հետ խորհրդակցութիւններն ու քննարկումները շարունակելու անհրաժեշտութիւնը, ինչպէս նաեւ նախապայմաններէ հեռու մնալու եւ բարձր կշռոյթի հռետորաբանութենէ զերծ մնալու կարեւորութիւնը, որպէսզի կարելի ըլլայ յանգիլ համախոհական նախագահի մը ընտրութեան:
Հանդիպումին ընթացքին հաստատուեցաւ, որ Լիբանանի հանրապետութեան համախոհական նախագահի ընտրութիւնը հիմնական քայլն է, որ պիտի նպաստէ երկրին դիմագրաւած ներկայ բոլոր տագնապներուն լուծման: