Ըստ նորանշանակ վարչապետ Մուսֆաթա Ատիպի մօտիկ աղբիւրներու, վերջինս յայտնած է, թէ լիբանանեան քաղաքական ուժերու մեծամասնութեան հաւանութեամբ՝ շատ արագ ժամանակամիջոցի մէջ պարտի կազմել մասնագէտներէ, ոչ քաղաքական գործիչներէ բաղկացած կառավարութիւն եւ անմիջապէս ձեռնարկել բարեփոխումներուն:
Ըստ Ատիպի՝ այս հիմամբ գործելու նպատակը ո՛չ մէկ կարծիքի առանձնաշնորհում է, ո’չ ալ լիբանանեան քաղաքական բաղադրիչներէն մէկուն թիրախաւորումը, այլ` մասնագէտներէ բաղկացած կառավարութեան մը կազմութիւնը: Ատիպ ընդգծած է, թէ այլ տիպի կառավարութիւն մը կազմելու որեւէ առաջարկ, պիտի չհամապատասխանէ իր նշանակումը հիմնաւորող առաքելութեան:
«Նկատի ունենալով, որ զգուշ եմ, եւ առաքելութիւնս համահունչ ըլլայ մասնագէտներէ բաղկացած կառավարութիւն գլխաւորելու սկզբունքին, Հանրապետութեան նախագահէն խնդրեցի այսօրուան հանդիպումը յետաձգել յետմիջօրէի, որպէսզի յաւելեալ խորհրդակցութիւններ կատարեմ նախքան վերջնական դիրքորոշումը ճշդելը», ընդգծեց Ատիպ երէկ կէսօրին:
Ըստ երեւոյթին երեւութապէս անլուծելի թուացող բազմաթիւ հարցերու առջեւ կը գտնուի նոր կառավարութեան կազմութիւնը:
Յետմիջօրէին Ատիպ ուղղուեցաւ նախագահական պալատ, ուր տեսակցութիւն ունեցաւ նախագահ Աունի հետ:
Նախագահ Աուն վարչապետէն խնդրեց շարունակել խորհրդակցութիւնները եւ յաղթահարել խոչընդոտները` տրուած ըլլալով, որ երկրին ներկայ կացութիւնը կը պահանջէ փրկարարական արագ աշխատանք, մանաւանդ որ 16 օր անցած է վարչապետի նշանակումէն, երկիրը կը սպասէ փոխըմբռնումի` նոր կառավարութիւն կազմելու համար: Խորհրդակցութիւններու աւարտի ժամկէտ չճշդուեցաւ:
Նախագահ Աուն վերահաստատեց ֆրանսական նախաձեռնութեան իր յանձնառութիւնը:
Հանդիպումէն ետք նոր նշանակուած վարչապետը յայտարարեց, թէ նախագահ Աունին հետ համաձայնած են յաւելեալ ժամանակ տրամադրել խորհրդակցութիւններուն: