Հանրապետութեան նախագահ զօր. Միշել Աուն երէկ նախագահական պալատին մէջ ընդունեց Լիբանանի մէջ օտար երկիրներու դիւանագիտական անձնակազմը` գլխաւորութեամբ Լիբանանի մէջ պապական նուիրակ գերապայծառ Ժոզեֆ Սփիթերիի:
Հանդիպումին ընթացքին նախագահ Աուն հաստատեց, որ տնտեսական եւ ելեւմտական ծանր տագնապի տակ գտնուող Լիբանանը, որ կը տառապի երկրին մէջ որդեգրուած ելեւմտական եւ տնտեսական ձախող գործելաոճին պատճառով, ենթակայ դարձած է աւելի սուր տագնապի մը` «Քորոնա» համաճարակին եւ այլ դէպքերու պատճառով:
«Լիբանան միշտ կ՛ակնկալէ, որ իր բարեկամ եւ եղբայր երկիրները օժանդակեն իրեն, որպէսզի ան կարենայ շրջանցել այս տագնապը», հաստատեց ան:
Նախագահ Աուն շեշտեց, որ Լիբանան միշտ ալ բարիք պիտի բերէ աշխարհի երկիրներուն, յատկապէս արաբական աշխարհին` աւելցնելով, որ ան չի կրնար դէպի այլ երկիրներ չարիք տրամադրող կամ գերիշխանութեան ու կայունութեան սպառնացող վտանգներու կամուրջ դառնալ:
Ան մաղթեց, որ կարգ մը երկիրներ Լիբանանը հաշուեյարդարի կռուախնձոր մը չնկատեն եւ զայն չսեպեն դաշտ մը, ուր կարելի է շրջանային իրենց հարցերը լուծել, այլ` բոլոր լիբանանցիներուն հետ վարուին առանց խտրութեան:
Նախագահ Աուն շնորհակալութիւն յայտնեց բոլոր երկիրներուն` Լիբանանի տրամադրած անոնց օժանդակութիւններուն համար, յատկապէս Պէյրութի նաւահանգիստի պայթումէն ետք տրամադրուած օժանդակութիւններուն համար: Ան աւելցուց սակայն, որ կարգ մը կողմեր շրջանցած են պետութիւնը եւ ուղղակի օժանդակութիւններ կատարած լիբանանցիներուն, իսկ այսօր անոնք կը փորձեն նիւթական եւ մարդասիրական յաւելեալ ներդրումներ կատարել` քաղաքական նպատակներ իրագործելու համար, «յատկապէս նկատի ունենալով այն իրականութիւնը, որ կը գտնուինք երեսփոխանական ընտրութիւններու սեմին», ըսաւ ան:
Նախագահ Աուն հաստատեց, որ ինք պատրաստ է` մինչեւ նախագահական պաշտօնավարման իր շրջանի աւարտը, կառավարութեան եւ խորհրդարանին հետ գործակցելու, որպէսզի կարենայ յաջողցնել իր խոստացած բարեկարգումները, հակառակ բոլոր խոչընդոտներուն:
Ան նշեց, որ բարեկարգումի առաջին կէտը, որուն յանձնառու կը մնայ, տնտեսական ու ելեւմտական ապաքինումի ծրագիրն է, որպէսզի կարելի ըլլայ անիկա քննարկել Միջազգային դրամական ֆոնտին հետ: Ան աւելցուց նաեւ, որ ինք նախանձախնդիր կը մնայ Կեդրոնական դրամատան հաշիւները իրաւական հաշուեքննութեան ենթարկելու որոշումին գործադրութեան:
Նախագահ Աուն շեշտեց, որ երեսփոխանական ընտրութիւնները ճշդուած թուականին պիտի կատարուին` աւելցնելով, որ ինք համոզուած է, թէ լիբանանցիները խորհրդարան պիտի հասցնեն այն երեսփոխանները, որոնք ատակ են իրականացնելու անոնց երազներն ու ձգտումները:
Նախագահ Աուն նկատել տուաւ, որ օրեր առաջ ինք լիբանանեան քաղաքական ուժերը հրաւիրած է երկխօսութեան նիստի մը` քննարկելու համար վարչական եւ ելեւմտական ապակեդրոնացեալ դրութիւնը, երկրին պաշտպանութեան ռազմավարութիւնը եւ տնտեսական ապաքինումի ծրագիրը, սակայն կարգ մը ուժերու ղեկավարութիւններ չեն ընդառաջած այդ հրաւէրին: «Այս վարուելակերպը զիս մղեց կառչած մնալու երկխօսութեան, որովհետեւ համոզուած եմ, որ անիկա է փրկութեան միակ ելքը», շեշտեց նախագահ Աուն:
Ան ընդգծեց, որ հակառակ իր հողերն ու գերիշխանութիւնը բոլոր միջոցներով պաշտպանելու Լիբանանի իրաւունքին, Լիբանան յանձնառու կը մնայ ՄԱԿ-ի թիւ 1701 բանաձեւի գործադրութեան, մինչդեռ Իսրայէլ կը շարունակէ անտեսել այդ բանաձեւին գործադրութիւնը:
Նախագահ Աուն հաստատեց նաեւ, որ Լիբանան կը փափաքի շարունակել հարաւային Լիբանանի ծովային սահմանագծումի աշխատանքը` պաշտպանելու համար տնտեսական շրջանի իր իրաւունքները:
«Հարաւային Լիբանանի մէջ ապահովական կայունութիւնը կարելի չէ ամրապնդել` առանց շրջանային կայունութեան ամրապնդումին: Ատիկա կարելի պիտի չըլլայ իրականացնել առանց գործադրելու արդար եւ ամբողջական խաղաղութիւն հաստատելու արաբական նախաձեռնութիւնը, որ հրապարակուեցաւ 2002-ին Պէյրութի մէջ, ինչպէս նաեւ առանց հիմնելու Պաղեստինի Հանրապետութիւնը` մայրաքաղաք Երուսաղէմով», հաստատեց ան:
Նախագահ Աուն ընդգծեց, որ լիբանանցիները կը փափաքին, որ աշխարհի երկիրները իրենց նեցուկ կանգնին, որպէսզի կարենան պահպանել իրենց հայրենիքն ու անոր բազմազանութիւնը, ինչպէս նաեւ բարիք կատարեն բոլորին: «Յուսախաբ մի՛ դարձնէք լիբանանցիները, այլ` օժանդակեցէ՛ք անոնց», եզրափակեց նախագահ Աուն:
Իր կարգին, գերապայծառ Սփիթերի յայտնեց, որ միջազգային ընտանիքը կը պնդէ երեսփոխանական ընտրութիւնները սահմանադրութեամբ ճշդուած ժամկէտին կատարելու կարեւորութիւնը` հաստատելով, որ այդ ընտրութիւնները պէտք է ըլլան ազատ, պարկեշտ եւ թափանցիկ ընտրութիւններ:
Գերապայծառ Սփիթերի իր օրհնութիւնները փոխանցեց Լիբանանին եւ լիբանանցիներուն` մաղթելով, որ անոնք ամուր մնան ազատութիւնը եւ ժողովրդավարութիւնը պահպանելու իրենց յանձնառութեան վրայ, որպէսզի շարունակեն յոյս ներշնչել` բազմազանութեան, համերաշխութեան եւ գոյակցութեան առումով:
Ան նշեց, որ լիբանանցիներուն մեծ մասը, յատկապէս երիտասարդները 2020-ի սեմին նկատեցին, որ Մեծն Լիբանանի հիմնադրութեան 100-ամեակը լաւ առիթ է բարեկարգումներու եւ փոփոխութիւններու, «սակայն դժբախբատաբար կարելի չեղաւ այդ փոփոխութիւնը իրականացնել», ըսաւ ան:
Գերապայծառ Սփիթերի շեշտեց, որ հակառակ տագնապին ու դժուարութիւններուն, լիբանանցիներուն միջեւ միասնականութիւնը կը մնայ հզօր` աւելցնելով, որ ժողովուրդը ոչ միայն կը պայքարի իր ապրուստը ապահովելու, այլեւ` կ՛օժանդակէ իր եղբայր լիբանանցիին:
Ան նկատել տուաւ, որ դիւանագիտական անձնակազմին մաս կազմող բոլոր դեսպաններն ու ներկայացուցիչները կապուած կը զգան Մայրիներու երկրին, սակայն Լիբանանի կառավարութիւնը պէտք է գործադրէ իրմէ պահանջուած բարեկարգումները:
Ան աւելցուց, որ Լիբանանի մէջ լուծումներու կարելի չէ յանգիլ, եթէ անկեղծ եւ փոխադարձ յարգանքի վրայ հիմնուած երկխօսութիւն տեղի չունենայ:
Ֆրանսական Խորհրդարանի Արտաքին Հարցերու Յանձնախումբի Մէկ Պատուիրակութիւնը Կ՛այցելէ Պաապտա
Միւս կողմէ, նախագահ Աուն Պաապտայի մէջ ընդունեց ֆրանսական խորհրդարանի արտաքին հարցերու յանձնախումբի մէկ պատուիրակութիւնը` գլխաւորութեամբ յանձնախումբի նախագահ Ժան Լուի Պուրլանժի: Պատուիրակութեան մաս կազմեցին ֆրանսացի երեսփոխաններ Քրիսթիան Հութին, Պրունօ Ժոնքուր, Ամելիա Լաքրաֆի եւ Վալերի Թոմաս, ինչպէս նաեւ Լիբանանի մէջ Ֆրանսայի դեսպան Անն Կրիօ:
Հանդիպումին ընթացքին նախագահ Աուն փափաք յայտնեց, որ գարնան տեղի ունենալիք երեսփոխանական ընտրութիւնները ըլլան իսկական առիթ մը, որուն ընթացքին լիբանանցիները փոփոխութիւն կատարեն` լիբանանեան վարչակարգը բարեկարգելու նպատակով:
Ան հաստատեց, որ վարչական ապակեդրոնացեալ դրութիւնը լաւագոյն ձեւերէն մէկն է, որ պէտք է որդեգրուի արդիականացնելու համար պետութիւնը եւ պահպանելու Լիբանանի ազգային միասնականութիւնը` իբրեւ երկիր, ժողովուրդ եւ հասատատութիւններ:
Նախագահ Աուն շեշտեց, որ Լիբանանի ծովային սահմանագծումին վերաբերող բանակցութիւնները մօտիկ ապագային պիտի վերսկսին` ամերիկացի միջնորդ Ամոս Հոքշթայնի Լիբանան ժամանումով:
Ան բարձր գնահատեց Լիբանանի նկատմամբ Ֆրանսայի նախագահ Էմանուէլ Մաքրոնի զօրակցական կեցուածքները` քաղաքական, տնտեսական եւ մարդասիրական բնագաւառներուն մէջ, եւ Պուրլանժէն խնդրեց իր ողջոյնները փոխանցել նախագահ Մաքրոնի:
Պուրլանժ նշեց, որ Լիբանան միշտ ներկայութիւն է ֆրանսացիներուն միտքերուն եւ սրտերուն մէջ` աւելցնելով, որ Փարիզ կը փափաքի օժանդակել Լիբանանին:
Ան Մաքրոնի ողջոյնները փոխանցեց Լիբանանին եւ լիբանանցիներուն` հաստատելով, որ ֆրանսացիները պատրաստ են օժանդակելու Լիբանանին, որպէսզի ան կարենայ դիմակալել տնտեսական, քաղաքական, ընկերային եւ այլ դժուարութիւններ:
Պուրլանժ ընդգծեց, որ ֆրանսական խորհրդարանական պատուիրակութեան Լիբանան կատարած այցելութեան նպատակն է Լիբանանի եւ Ֆրանսայի միջեւ հեզասահ ու պատմական յարաբերութեան գոյութիւնը վերահաստատել, եւ գնահատել հանրապետութեան նախագահին դերակատարութիւնը` երկրին զարթօնքը ապահովելու ուղղութեամբ, ինչպէս նաեւ մօտէն ծանօթանալ Լիբանանի մէջ տիրող կացութեան:
«Լիբանանի կառավարութեան կատարելիք բարեկարգումները կարեւոր քայլ մը կը նկատուին` տնտեսական ապաքինում եւ բարգաւաճում իրականացնելու ճամբուն վրայ», ըսաւ Պուրլանժ` վերահաստատելով, որ Լիբանան կատարած իրենց այցելութեան նպատակն է օժանդակել Լիբանանին: