Հանրապետութեան նախագահ զօր. Միշել Աուն երէկ նախագահական պալատին մէջ ընդունեց Լիբանանի մէջ Եւրոպական Միութեան ներկայացուցիչ Ռալֆ Թրաֆը, որ նախագահ Աունին յանձնեց Եւրոպական Միութեան արտաքին քաղաքականութեան բարձրագոյն յանձնակատար Ժոզեֆ Պորելի յղած նամակը:
Հանդիպումէն ետք Թրաֆ յայտնեց, որ Եւրոպական Միութեան արտաքին քաղաքականութեան բարձրագոյն յանձնակատարը իր նամակին ընդմէջէն կոչ ուղղեց նախագահ Աունին եւ լիբանանեան քաղաքական դասակարգին ամէնէն արագ ժամանակամիջոցին կազմելու կառավարութիւն մը, ինչպէս նաեւ կատարելու այն բոլոր բարեկարգումները, որոնք Լիբանանը դուրս կը բերեն զինք յուզող ներկայ տագնապէն:
Նամակին մէջ անդրադարձ կատարուեցաւ Եւրոպական Միութեան կողմէ նախորդ տարիներուն, ինչպէս նաեւ Պէյրութի նաւահանգիստի պայթումին ընթացքին Լիբանանի տրամադրուած օժանդակութիւններուն` ընդգծելով, որ Եւրոպական Միութիւնը պատրաստ է նաեւ յաւելեալ օժանդակութիւններ տրամադրելու Լիբանանին` կառավարութեան կազմութենէն ետք:
«Իր նամակին մէջ Պորել շեշտեց, որ Լիբանան փլուզման ընթացքին մէջ է, իսկ Լիբանանի մէջ տիրող ընկերային իրարանցումը, վտանգն ու ապակայունութիւնը հետզհետէ կ՛ամրապնդուին: Հետեւաբար հանրապետութեան նախագահն ու վարչապետը պէտք է համաձայն գտնուին ամէնէն արագ ժամանակամիջոցին կազմելու կառավարութիւն մը` լիբանանցիներուն շահերը ապահովելու համար», ըսաւ Թրաֆ: