Հանրապետութեան նախագահ զօր. Միշել Աուն երէկ «Լիբանանեան արժանեաց ոսկեայ շքանշան» ընծայեց բժշկութեան ոլորտին մէջ 2021 թուականի Նոպելեան մրցանակին արժանացած ամերիկաբնակ լիբանանահայ Արտեմ Փաթափութեանին:
Նախագահ Աուն բարձր գնահատեց լիբանանահայ գիտնականը, որ մրցանակին արժանացած է ջերմաստիճանի ընկալիչներու եւ շօշափելիքի ուսումնասիրութեան ժամանակ իր կատարած իւրայատուկ բացայայտումներուն համար:
«Այս իրադարձութիւնը հպարտութիւն է իւրաքանչիւր լիբանանցիի համար, ինչպէս նաեւ գնահատանք է ձեր գիտական երկարատեւ հետազօտութիւններուն, որոնք արդիւնաւորուեցան այս նուաճումով: Իրագործում մը, որ Լիբանանի համար նաեւ նուաճում է, յատկապէս երկրին դիմագրաւած ներկայ դժուար պայմաններուն լոյսին տակ», ըսաւ նախագահ Աուն:
Ան հաստատեց, որ ամբողջ մարդկութիւնը շնորհակալ պիտի ըլլայ Արտեմ Փաթափութեանի գիտական նուաճումին համար, որ պիտի օժանդակէ մարդկային մարմինը աւելի ամբողջական կերպով ուսումնասիրելու եւ հասկնալու:
«Ջանասիրաբար կատարած ձեր անխոնջ աշխատանքին եւ գիտական ուսումնասիրութիւններուն համար ստացած այս բարձրագոյն մրցանակին արժանի էք, եւ գնահատելու համար ձեր նուաճումը, ձեզի կը շնորհեմ «Լիբանանեան արժանեաց ոսկեայ շքանշան»-ը` մաղթելով նորանոր յաջողութիւններ, նուաճումներ եւ առողջութիւն», շեշտեց նախագահ Աուն:
Նշենք, որ Արտեմ Փաթափութեան մասնիկային կենսաբան եւ ջղաբան է: Ան ներկայիս կ՛աշխատի Քալիֆորնիոյ Լա Խոյա շրջանին մէջ գտնուող «Սքրիփս Ռիսըրչ» կեդրոնին մէջ:
53-ամեայ Փաթափութեան ծնած է Պէյրութ, ուր կենսաբանութիւն ուսանած է Պէյրութի ամերիկեան համալսարանին մէջ եւ 1986-ին գաղթած է Միացեալ Նահանգներ:
Վարչապետ Միքաթի Շնորհաւորեց
Արտեմ Փաթափութեանը
Վարչապետ Նեժիպ Միքաթի իր կարգին շնորհաւորեց Արտեմ Փաթափութեանը բժշկութեան Նոպելեան մրցանակ ստանալուն առիթով: Ան հաստատեց, որ լիբանանահայ գիտնականին ստացած այս մրցանակը հպարտութիւն է իրեն համար:
Միքաթի ողջունեց եւ յաջողութիւն մաղթեց Ա. Փաթափութեանին, որ Լիբանանի անունը բարձր պահած է եւ փաստած հմտութիւն մը, որ կը ձգտի ծառայել մարդկութեան:
«Յաւելեալ յաջողութիւններ եւ նուաճումներ կը մաղթեմ ձեզի», շեշտեց Միքաթի: