Հանրապետութեան նախագահ զօր. Միշել Աուն շաբաթավերջին նախագահական պալատին մէջ ընդունեց երիտասարդական պատուիրակութիւն մը, որուն ներկայութեան շեշտեց, որ Լիբանանի բարելաւման, ինչպէս նաեւ ելեւմտական եւ տնտեսական առողջացման համար մշակուած որեւէ ծրագիրի ձախողեցումը կը նշանակէ, թէ փտած համակարգը կը վախնայ հաշուետուութենէ եւ հարցապնդումէ, «որովհետեւ բարեփոխումի որեւէ ծրագիր նախ եւ առաջ պիտի ճշդէ արձանագրուած վնասները, երկրորդ` պատասխանատուութիւնները, իսկ երրորդ` այդ հարցերը լուծելու միջոցները», ըսաւ ան:
Նախագահ Աուն հաստատեց, որ նիւթական վնասները առանց ճշդելու գումարներու բաշխումը` Կեդրոնական դրամատան, դրամատուներուն եւ պետութեան միջեւ, հիմնական երկու վտանգաւոր հարցերու յանգեցաւ. «Առաջին` պատասխանատուները չիմացան երկրին ելեւմտական քանդումին մասին, իսկ երկրորդ` ժողովուրդը առանձինն կը կրէ ելեւմտական փլուզումին եւ դրամատնային իր հաշիւներուն վիճակին անորոշութեան պատասխանատուութիւնը, մինչդեռ` ժողովուրդը զոհն է եւ ոչ թէ դահիճը: Ոչ ոք, ինչքան ալ բարձր ըլլայ անոր պաշտօնը, իրաւունք ունի ժողովուրդը պատասխանատու նկատելու երկրին մէջ որդեգրուած սխալ, քանդիչ եւ փտած քաղաքականութիւններուն», հաստատեց նախագահ Աուն:
Հանրապետութեան նախագահը նշեց, որ լիբանանցիներուն իրաւունքն է իմանալ, թէ ո՛վ ամէնօրեայ դրութեամբ կը շահագործէ զիրենք եւ կ՛օգտագործէ դրամատնային իրենց հաշիւները: «Ժողովուրդս գողցուած է եւ ամէնօրեայ դրութեամբ գողութեան կ՛ենթարկուի», եզրափակեց ան: