Հանրապետութեան նախագահ զօր. Միշել Աուն երէկ նախագահական պալատին մէջ ընդունեց Եւրոպական խորհուրդի փոխնախագահ Մարկարիթիս Սքինասը` ընկերակցութեամբ պաշտօնական պատուիրակութեան մը, որուն մաս կազմեց նաեւ Լիբանանի մէջ Եւրոպական Միութեան դեսպան Ռալֆ Թրաֆ:
Հանդիպումին քննարկուեցաւ Լիբանանի մէջ սուրիացի տեղահանուածներուն թղթածրարը, որուն լոյսին տակ նախագահ Աուն հաստատեց, որ Լիբանան այլեւս կարողութիւն չունի հանդուրժելու սուրիացի տեղահանուածներուն բեռը:
Նախագահ Աուն Եւրոպական խորհուրդէն պահանջեց աշխատիլ` դէպի սուրիական ապահովական շրջաններ տեղահանուածներուն տունդարձը դիւրացնելու համար:
Միւս կողմէ, նախագահ Աուն երէկ ստորագրեց թիւ 247 օրէնքը, որուն հիման վրայ կատարուեցաւ յատկացումը 500 միլիառ լ. ոսկիի, որմէ 350 միլիառ լ. ոսկի պիտի յատկացուի անձնական դպրոց յաճախող լիբանանցի աշակերտներուն` 2019-2020 տարեշրջանի կրթաթոշակին, իսկ 150 միլիառ լ. ոսկի` պետական դպրոցներուն եւ կրթական հիմնարկներուն:
Նախագահ Աուն ստորագրեց նաեւ թիւ 245 օրէնքը, որուն հիմամբ, 2021-ի պետական ամավարկին պիտի կցուի 1200 միլիառ լ. ոսկի` կարենալ փակելու համար 2021-ի պետական ամավարկին տարբեր ծախսերը:
Ան ստորագրեց նաեւ երեք այլ օրէնքներ, որոնք Իրաքի եւ Գերմանիոյ պետութիւններուն հետ գործակցութեան, ինչպէս նաեւ արտօնագիրով գործող զբօսաշրջական կարգ մը հաստատութիւններուն օժանդակութիւն յատկացնելու կը վերաբերին` պայմանով որ այդ օժանդակութիւնը կատարուի ելեւմուտքի նախարարութեան հետ գործակցաբար: