Հանրապետութեան նախագահ զօր. Միշել Աուն հարցազրոյցի մը ընթացքին յայտնեց, որ ինք դիտմամբ ուշացուցած է վարչապետի նշանակման երեսփոխանական պարտադիր խորհրդակցութիւնները, որպէսզի երեսփոխանական պլոքներուն առիթ տայ` թեկնածուի մը շուրջ համախոհութիւն գոյացնելու, «որովհետեւ բուն հարցը յաջորդ քայլին, այսինքն` կառավարութեան կազմութեան հոլովոյթին մէջ կ՛իյնայ»:
Նախագահ Աուն ընդգծեց, որ խորհրդակցութիւնները պիտի կատարուին` աւելցնելով, որ իրենք կը փափաքին ունենալ տնտեսական տագնապի լուծման ատակ արհեստավարժ վարչապետ մը:
Նախագահ Աուն շեշտեց նաեւ, որ յառաջիկայ փուլին համար ինք կը զօրակցի քաղաքական կառավարութեան մը կազմութեան, յատկապէս նկատի ունենալով երկրին դիմագրաւած դժուարութիւններն ու մարտահրաւէրները: Ան շեշտեց, որ կառավարութեան ուժը անոր հաւասարակշռութեան մէջ է: «Իսկ եթէ կառավարութիւնը հաւասարակշռուած է, ի՞նչը կ՛արգիլէ, որ ան ըլլայ ազգային միասնականութեան կառավարութիւն», հարց տուաւ ան:
Նախագահ Աուն շեշտեց, որ նախագահական ընտրութիւնները պիտի կատարուին ճշդուած թուականին` աւելցնելով, որ իր կարծիքով` նախագահական ընտրութիւնը պիտի կատարուի 31 օգոստոսէն 21 հոկտեմբերի միջեւ:
Միւս կողմէ, ան հաստատեց, որ կառավարութեան կազմութեան եւ նախագահական ընտրութեան թուականներուն միջեւ կայ հոլովոյթ մը, որ պէտք է ամբողջանայ, եւ ատիկա Կեդրոնական դրամատան կառավարիչ Ռիատ Սալամէի հարցն է:
«Սալամէ յանցագործ է եւ մեղսակից մը, որ ունի իր մեղսակից գործընկերները», ըսաւ ան` աւելցնելով, որ իրեն համար յստակ չէ, թէ դատական իշխանութիւնները ինչո՞ւ կը յապաղին զայն ամբաստանելու իմաստով:
Այս շրջագիծին մէջ նախագահ Աուն յայտնեց, որ Կեդրոնական դրամատան իրաւական հաշուեքննութեան կատարման սեմին կը գտնուինք` աւելցնելով, որ 27 յունիսին Լիբանան կը հասնի իրաւական հաշուեքննութիւնը կատարող գլխաւոր խումբը:
Նախագահ Աուն ընդգծեց, որ նախքան իր նստաշրջանի աւարտը, պիտի փակէ իրաւական հաշուեքննութիւնը, որուն վերջնական արդիւնքը Պաապտայէն բացի ոչ մէկ տեղէ պիտի յայտարարուի:
Նախագահական իր նստաշրջանը աւարտին հասցնելու առումով մնացած կարճ ժամանակամիջոցին մասին հարցումի մը պատասխանելով` նախագահ Աուն շեշտեց, որ ինք տկար չէ եւ չէ տկարացած իր կեանքին բոլոր փուլերուն ընթացքին, ինչպէս նաեւ իր կեցուածքներուն մէջ: «Հետեւաբար վերջին ամիսներուն ալ տկարացած չեմ, սակայն նողկացած», եզրափակեց ան: