Հանրապետութեան նախագահ զօր. Միշել Աուն երէկ նախագահական պալատին մէջ ընդունեց ամերիկեան Քոնկրեսի արտաքին հարցերու յանձնախումբի մէկ պատուիրակութիւնը գլխաւորութեամբ ծերակուտական Քրիս Մըրֆիի եւ ներկայութեամբ Լիբանանի մէջ Միացեալ Նահանգներու դեսպան Տորըթի Շիայի:
Հանդիպումին ընթացքին քննարկուեցան լիբանանեան իրադարձութիւնները եւ յառաջիկայ փուլին ընթացքին կատարուելիք աշխատանքները:
Նախագահ Աուն ընդգծեց, որ կառավարութեան կազմութեան հոլովոյթին մէջ զարգացում արձանագրուած է` աւելցնելով, որ կառավարութենէն պահանջուածը բարեկարգումներու իրագործումն է, ինչպէս նաեւ երկրին տնտեսական զարգացում ապահովելը:
Նախագահ Աուն հաստատեց նաեւ, որ երեսփոխանական ընտրութիւնները պիտի կայանան սահմանադրութեամբ ճշդուած թուականին, այսինքն` 2022-ի գարնան: «Պիտի հսկենք, որ այդ ընտրութիւնները կայանան ազատութեան եւ պարկեշտութեան մթնոլորտի մէջ, որովհետեւ ժողովրդավարութիւնը օրէնսդրական եւ գործադիր իշխանութիւններուն մէջ վերանորոգում կ՛ենթադրէ` թօթափելու համար 1990-էն մինչեւ օրս արձանագրուած ձախողութիւնները», ըսաւ նախագահ Աուն:
Նախագահ Աուն շեշտեց նաեւ, որ ինք յանձնառու կը մնայ փտածութեան դէմ պայքարին` աւելցնելով, որ Լիբանանի որդեգրած իրաւական հաշուեքննութեան որոշումը փտածութեան դէմ պայքարի եւ բարեկարգումի կարեւորագոյն քայլերէն է:
Նախագահ Աուն ընդգծեց նաեւ, որ Լիբանան կառչած կը մնայ միջազգային բանաձեւերու գործադրութեան, յատկապէս Ապահովութեան խորհուրդի թիւ 1701 բանաձեւի գործադրութեան: Ան բարձր գնահատեց լիբանանեան բանակին եւ ՖԻՆԻՒԼ-ի միջազգային խաղաղապահ ուժերուն միջեւ գործակցութիւնը:
Միւս կողմէ, նախագահ Աուն շնորհակալութիւն յայտնեց լիբանանեան բանակին տրամադրուած ամերիկեան օժանդակութեան համար:
Նշենք, որ նախագահ Աուն ստորագրեց հրամանագիր մը, որուն հիման վրայ 4 միլիառ 927 միլիոն լ. ոսկի պիտի յատկացուի «Ալվարեզ էնտ Մարսըլ» ընկերութեան` Կեդրոնական դրամատան իրաւական հաշուեքննութեան նպատակով:
Ամերիկեան Քոնկրեսի արտաքին հարցերու յանձնախումբի մէկ պատուիրակութիւնը յետմիջօրէին այցելեց նաեւ խորհրդարանի նախագահ Նեպիհ Պըրրիի, վարչապետ Նեժիպ Միքաթիի եւ բանակի հրամանատար զօր. Ժոզեֆ Աունի