Հանրապետութեան նախագահ զօր. Միշել Աուն երէկ առաւօտեան ընդունեց վարչապետ Նեժիպ Միքաթին, որուն հետ քննարկեց երկրին իրադարձութիւններն ու կառավարութեան կազմութեան թղթածրարը:
Պաապտայէն մեկնումի ընթացքին վարչապետ Միքաթի ըսաւ. «29 յունիսին նախագահ Աունին ներկայացուցի կառավարութեան կազմի պատկերացում մը, որուն մասին այսօր քննարկումներ կատարեցինք եւ պիտի շարունակենք խորհրդակցիլ: Խորհրդակցութիւններն ու քննարկումները պիտի շարունակուին, որովհետեւ տեսակէտներուն միջեւ հսկայ տարբերութիւններ չկան»:
Հոքշթայն Կը Հաստատէ, Որ Կայ Յառաջդիմութիւն,
Որ Կրնայ Հասցնել Համաձայնութեան
Միւս կողմէ, Լիբանան-Իսրայէլ ծովային սահմանագծումի անուղղակի բանակցութիւններուն հսկող ամերիկացի բանագնաց Էյմըս Հոքշթայն նախորդ քանի մը օրերուն ընթացքին նախաձեռնեց հեռաձայնային հաղորդակցութիւններու կարգ մը լիբանանեան հեղինակութիւններու հետ` անոնց յայտնելու համար, թէ ժխտական ամբողջ մթնոլորտը Լիբանանի մէջ շրջանառութիւն կը կատարէ, մինչդեռ սահմանագծումի թղթածրարին առումով գործող ամերիկեան եւ իսրայէլեան հեղինակութիւններ կը տեսնեն լուծման յանգելու հսկայ կարելիութիւններ:
Հոքշթայն յայտնեց, որ Լիբանան կատարած իր վերջին այցելութեան ընթացքին ուշ գիշերին Նաքուրայէն անցած է Թել Աւիւ, սակայն չէ կրցած իսրայէլացիներուն հետ քննարկել սահմանագծումի թղթածրարը, որովհետեւ իսրայէլացի պատասխանատուները Կազայի դէմ պատերազմի մանրամասնութիւններով զբաղած էին: Ան նկատել տուաւ, որ Իսրայէլի նախարարական սեղմ կազմը չէ անդրադարձած ծովային սահմանագծումին` աւելցնելով, որ ինք հանդիպում մը ունեցած է Իսրայէլի վարչապետին հետ, եւ երկուստեք համաձայնած են դրական շրջագիծի մը շուրջ:
Հոքշթայն ընդգծեց, որ ինք կը սպասէ Իսրայէլ ուղղուելու ժամադրութեան մը, որուն հիման վրայ քայլեր պիտի առնուին:
Հոքշթայն հաստատեց, որ կայ յառաջդիմութիւն, որ կրնայ հասցնել համաձայնութեան, որովհետեւ Ուաշինկթըն եւ Թել Աւիւ յանձնառու են Լիբանանի ծովային սահմաններն ու իրաւունքները յարգելու եւ վաւերացնելու: