Նախագահ Սերժ Սարգսեան երէկ Սթրազպուրկի մէջ մասնակցեցաւ Եւրոպական խորհուրդի խորհրդարանական վեհաժողովի (ԵԽԽՎ) ձմեռնային նստաշրջանի լիագումար նիստին, ուր հանդէս եկաւ ելոյթով եւ պատասխանեց խորհրդարանականները հետաքրքրող հարցումներուն:
Նախագահ Սերժ Սարգսեան իր ելոյթին ընթացքին ըսաւ. «Անցեալ անգամ պատիւ ունեցած եմ ելոյթով հանդէս գալու այս բարձր ամպիոնէն 2013-ին, երբ Հայաստանը կը նախագահէր Եւրոպական խորհուրդի նախարարներու կոմիտէն: Այդ առաքելութիւնը կարեւոր էր Եւրոպական խորհուրդի ընդարձակ ընտանիքին մէջ մեր համարկումի տեսանկիւնէն: Կը կարծեմ` մենք այդ գործը պատուով իրականացուցինք:
25 յունուարը այն օրն է, երբ մենք 17 տարի առաջ անդամակցեցանք Եւրոպական խորհուրդին: Երբ կ՛անդամակցէինք համաեւրոպական այս կառոյցին, լիովին կը գիտակցէինք, թէ ի՛նչ ճամբայ ունինք անցնելիք: Կը գիտակցէինք նաեւ, որ ժողովրդավարութեան կառուցումն ու ամրապնդումը առանց Եւրոպական խորհուրդի կառոյցներու աջակցութեան եւ անմիջական մասնակցութեան դիւրին պիտի չըլլային»: Նախագահ Սարգսեան ըսաւ, թէ քաղաքական կամքի ու միացեալ կառուցողական աշխատանքի շնորհիւ կարելի եղաւ յաղթահարել բազմաթիւ խոչընդոտներ եւ հասնիլ խորքային բարեփոխումներու:
Նախագահ Սարգսեան յայտարարեց. «Այսօր վեհաժողովի այս դահլիճին մէջ, հպարտութեամբ կրնամ յայտարարել. մենք կատարած ենք Եւրոպական խորհուրդին առջեւ ստանձնած` Հայաստանի ժողովրդավարացման հիմնական յանձնառութիւնները: Ասիկա միայն մեր պնդումը չէ: Ժողովրդավարական հաստատութիւններու կայացման ուղղութեամբ մեր արձանագրած յաջողութիւնները ճանչցուած են Եւրոպական խորհուրդի համապատասխան մարմիններուն զեկուցումներով»:
Անդրադառնալով Վենետիկի յանձնաժողովին հետ Հայաստանի համագործակցութեան` հանրապետութեան նախագահը ըսաւ, որ փորձագիտական կարծիքի հիման վրայ լրամշակուած էր սահմանադրական բարեփոխումներու ծրարը: Աւելցնելով, թէ փոխադարձ վստահութեան մթնոլորտին մէջ արդիւնաւէտ այս աշխատանքը մինչեւ այսօր կը շարունակուի` բարեփոխուած Սահմանադրութեան ներքեւ բազմաթիւ նոր օրէնսդրական լուծումները կեանքի կոչելու հոլովոյթով:
Նոյն ծիրին մէջ, նախագահը յայտնեց. «Մենք կարեւոր կը նկատենք Մարդու իրաւունքներու եւրոպական դատարանի (ՄԻԵԴ) դերը, որուն որոշումներն ու վճիռները կարեւոր նշանակութիւն կ՛ունենան մեր երկրին մէջ արդարադատութեան որակի բարձրացման առումով: ՄԻԵԴ-ի որոշումներուն հիման վրայ կատարած ենք շարք մը օրէնսդրական բարեփոխումներ: Մեր այդ աշխատանքը աննկատ չ՛անցնիր. ՄԻԵԴ-ի վճիռները պատշաճօրէն եւ հետեւողականօրէն կատարելու հարցով Հայաստանի Հանրապետութիւնը Եւրոպական խորհուրդի անդամ երկիրներու յառաջատարներէն մէկն է: Հաւատացած ենք, որ մարդու իրաւունքներու պատշաճ երաշխաւորումն ու ժողովրդավարական արժէքներու ամրապնդումը չեն կրնար արդիւնաւէտ ըլլալ` առանց փտածութեան դէմ անզիջում պայքարի: Մենք լրջօրէն տրամադրուած եւ յանձնառու ենք շարունակելու մեր համակարգային եւ հետեւողական ամէնօրեայ աշխատանքը` փտածութեան ախտը արմատախիլ ընելու ուղղութեամբ»:
Անդրադառնալով Լեռնային Ղարաբաղի տագնապի խաղաղ լուծման հարցին` նախագահ Սերժ Սարգսեան պատմական ներկայացում մը կատարելէ ետք ըսաւ. «Եւրոպական խորհուրդին անդամակցելէ ետք` Հայաստանը պարտաւորութիւն ստանձնեց նաեւ հետամուտ ըլլալու Լեռնային Ղարաբաղի տագնապը բացառապէս խաղաղ ճամբով լուծելու` շարունակելով այդ նպատակով գործադրել իր ազդեցութիւնը Արցախի վրայ»:
Շարունակելով իր խօսքը Արցախի տագնապին մասին` նախագահ Սարգսեան նշեց. «Արդարութեան պակասի եւ բնաջնջման սպառնալիքի պայմաններուն մէջ Արցախը չունէր որեւէ այլ ելք, քան ինքնապաշտպանութեան դիմելը: Այստեղ եւս ես առաջին շարքերուն մէջ եղած եմ եւ ոչ մէկ վայրկեան կ՛ափսոսամ ժամանակին կատարած իմ ընտրութեան համար»:
«Տագնապը լուծելու ժամանակը շատոնց հասունցած է: Անհրաժեշտ է խստագոյնս պահպանել հաստատուած զինադադարի դրութիւնը եւ կատարել նախապէս ձեռք բերուած բոլոր պայմանաւորուածութիւնները: Հանգուցալուծումը պէտք է ըլլայ խաղաղ եւ յաղթահարէ արդարութեան պակասը: Ես այս հարցով նոյնպէս առաջին շարքերուն մէջ պիտի ըլլամ, ուր ալ գտնուիմ: Կողմերը պէտք է միասին ստանձնեն Լեռնային Ղարաբաղի տագնապի խաղաղ լուծման պատասխանատուութիւնը` գտնելով փոխզիջումային հանգուցալուծում:
«ԵԱՀԿ-ի Մինսքի խմբակի համանախագահներու հովանիին ներքեւ ընթացող բանակցային հոլովոյթը այս տագնապի լուծման միջազգայնօրէն համաձայնեցուած միակ ձեւաչափն է: Այս ձեւաչափին բազմիցս իր աջակցութիւնը յայտնած է միջազգային հանրութիւնը, այդ կարգին նաեւ Եւրոպական խորհուրդը: Հայաստանի եւ Ազրպէյճանի ստանձնած յանձնառութիւնը կը պահանջէ հակամարտող բոլոր կողմերուն միացեալ ջանքերը:
«Սակայն Ազրպէյճան ակնյայտօրէն պատրաստ չէ անոր: Ապրիլ 2016-ին Արցախի դէմ Ազրպէյճանի սանձազերծած գործողութիւնը ուղեկցուեցաւ խաղաղ բնակչութեան եւ ռազմագերիներու դէմ միջազգային մարդասիրական իրաւունքի աղաղակող խախտումներով: Ատիկա ծանր հարուած էր բանակցային հոլովոյթին, որ արթնցուց Սումկայիթի ջարդերուն մասին սոսկալի յուշերը:
«Վեհաժողովի բոլոր անդամներուն կոչ կ՛ուղղեմ գիտակցելու, թէ ի՛նչ բացասական հետեւանքներ կրնան ունենալ անզգուշ կամ կողմնակալ ձեւակերպումները Արցախի մէջ առկայ առանց այդ ալ փխրուն կայունութեան վրայ:
«Պատերազմի մնայուն վտանգին ներքեւ Արցախը կը շարունակէ ժողովրդավարութիւն կառուցել եւ խրախուսել մարդու իրաւունքներու պաշտպանութիւնը: Այս բոլորին մէջ Հայաստանը թեւ ու թիկունք պիտի ըլլայ Արցախին, հետեւողականօրէն պիտի պաշտպանէ Արցախի շահերը եւ իրաւունքները, պիտի նպաստէ Արցախի անվտանգութեան ամրապնդման», հաստատած է նախագահ Սարգսեան:
Նախագահ Սերժ Սարգսեանը իր ելոյթին ընթացքին չշրջանցեց նաեւ Եւրասիական տնտեսական միութեան (ԵՏՄ) Հայաստանի անդամակցութեան նիւթը` շեշտելով, որ ժամանակը ցոյց տուաւ, թէ ԵՏՄ-ին անդամակցութիւնը խոչընդոտ չէ Եւրոպական Միութեան հետ համագործակցութեան համար: Ի դէպ` պատասխանելով եւրոպացի պատգամաւորի հարցումին, թէ Հայաստանը ինչպէ՛ս պիտի համատեղէ ԵՏՄ-ի եւ Եւրոպական Միութեան հետ համագործակցութիւնը, նախագահ Սերժ Սարգսեան շեշտեց, թէ անոր համար շատ պարզ նախապայման կայ` անկեղծութիւնը:
«Պէտք է անկեղծ ըլլալ գործընկերներուն հետ, չթաքցնել բանակցութիւններու ընթացքը: Ես կը կարծեմ, որ ապագային սերտօրէն համագործակցութիւն պիտի ըլլայ Եւրասիական տնտեսական միութեան եւ Եւրոպական Միութեան միջեւ», նշեց ան:
Աւելցնենք, որ նախագահ Սերժ Սարգսեան Եւրոպական խորհուրդին մէջ խօսեցաւ նաեւ Հայաստանի` խորհրդարանական կառավարման անցնելու կարեւորութեան մասին, վստահեցնելով, որ այդ համակարգը պիտի նպաստէ ժողովրդավարութեան զարգացման, մարդու իրաւունքներու պաշտպանութեան եւ կարելիութիւն պիտի տայ աւելի հաշուետուողական ըլլալու: