Հըզպալլայի ընդհանուր քարտուղարի տեղակալ շէյխ Նայիմ Քասեմ հարցազրոյցի մը ընթացքին յայտնեց, որ Հըզպալլայի կարողութիւնները բարելաւուած են եւ բարգաւաճած, իսկ թշնամին կարգ մը շրջաններու մէջ նահանջ արձանագրած է:
Ան ընդգծեց, որ Հըզպալլայի ընդհանուր քարտուղար սէյիտ Հասան Նասրալլայի արտասանած խօսքէն ետք չեն փափաքիր բանավէճ ունենալ, «սակայն յստակ է, որ նաւթային յեղափոխութեան կարիքը կայ` նկատի ունենալով անոր կարեւորութիւնը` մեր ապրած պայմաններուն մէջ», ըսաւ ան:
Քասեմ նշեց, որ Հըզպալլան կառավարութեան մաս կազմելով կը պաշտպանէ երկրին քաղաքական որոշումն ու ինքնաբերաբար Դիմադրութիւնը: «Մեր ներկայութիւնը կ՛օժանդակէ բարեկարգումի գործադրութեան, իսկ անոնք, որոնք Հըզպալլան Լիբանանի համար բեռ կը նկատեն, ապա անոնց հարցը կը կայանայ այն մտածումներուն մէջ, որոնք լիբանանցի ժողովուրդին համար համոզիչ չեն», ընդգծեց ան:
Քասեմ հաստատեց, որ կառավարութեան մաս կազմելը անհրաժեշտ է` աւելցնելով, որ փտածութեան իմաստով իրենք ոչ ոքի կ՛օժանդակեն, այլ ժողովուրդին կ՛աջակցին` առանց գնահատանքի խօսք մը իսկ ակնկալելու:
«Պիտի մնանք Լիբանանի մէջ եւ պիտի մասնակցինք կառավարութեան, որպէսզի կարելի եղածին չափ ծառայենք լիբանանցիներուն: Մեր որոշումը տրուած է այն իմաստով, որ Դիմադրութեան զէնքը ներքին լիբանանեան նպատակներով չ՛օգտագործուի: Հըզպալլայի զէնքին պարտականութիւնը իսրայէլեան բռնագրաւումին դիմադրելն է եւ երկրին գերիշխանութիւնը պաշտպանելը: Երբ լիբանանեան բանակը կարենայ դիմադրել Իսրայէլին եւ պաշտպանել Լիբանանը, այն ժամանակ թող քննարկեն Հըզպալլայի զէնքին հարցը», ըսաւ ան:
Քասեմ նկատել տուաւ, որ Լիբանանի դիմագրաւած ներքին հարցերուն բնոյթը պէտք է ճշգրիտ կերպով իմանալ եւ ըստ այնմ լուծումներու մասին մտածել: Ան ընդգծեց, որ Միացեալ Նահանգներուն չափ եւ սահման պէտք է ճշդել:
Անդրադառնալով Լիբանանի մէջ տիրող իրավիճակին` Քասեմ յայտնեց, որ կառավարութեան չկազմուելուն եւ նախագահական ընտրութեան չկայացման պարագային երկիրը կ՛ուղղուի դէպի վատագոյնը: «Բոլորս պէտք է համագործակցինք, եւ մենք բաց ենք գործակցելու նոր երեսփոխաններուն եւ Մարտ 14-ի խմբաւորումներուն հետ` դուրս գալու համար երկիրը յուզող տագնապէն», հաստատեց ան:
Քասեմ մաղթեց, որ հանրապետութեան նախագահն ու վարչապետը համաձայնութիւն գոյացնեն կառավարութեան կազմի մը շուրջ: «Մեզի համար կառավարութեան կազմին ձեւը կարեւոր չէ, այլ` նախագահին եւ վարչապետին միջեւ համաձայնութիւնը: Մենք կ՛ընդունինք անոնց միջեւ գոյացած որեւէ համաձայնութիւն», եզրափակեց ան: