Ներքին գործոց եւ քաղաքապետութեանց հարցերու նախարար Պասսամ Մաուլաուի երէկ հրապարակեց շրջաբերական մը, որ կը վերաբերի քուէարկութեան ընթացքին բջիջայինի գործածութեան:
Շրջաբերականին համաձայն, երբ քուէարկողը քուէարկութեան համար առանձնանայ, ապա իրաւունք չունի իր բջիջային հեռաձայնը գործածելու, ինչպէս նաեւ իրաւունք չունի իր քուէաթերթիկը հրապարակաւ ցոյց տալու, այլապէս` ընտրակեդրոնին պատասխանատուին կողմէ կ՛արգիլուի անոր, որ քուէն զետեղէ քուէատուփին մէջ, եւ այդ դէպքին մասին տեղեկագիր կը պատրաստուի:
Միւս կողմէ, Մաուլաուի յայտնեց, որ քուէարկութիւնը իրաւունք է եւ պարտաւորութիւն, եւ կոչ ուղղեց սիւննի համայնքին` մասնակցելու երեսփոխանական ընտրութիւններուն, որպէսզի Լիբանանը կարելի ըլլայ փրկել «այլ տեսակի պատերազմէ մը»: