Ծագումով լեհ-հրեայ ընկերաբան Սիկմոնթ Պոման, լեհական «Փոլիթիքա» շաբաթաթերթին տուած հարցազրոյցին մէջ Արեւմտեան Ափին շուրջ կառուցուած ցանկապատը կը նմանցնէ Վարշավիոյ Կեթոյին ցանկապատերուն:
Պոման կ’ըսէ, թէ Իսրայէլ կը սարսափի խաղաղութենէն, միաժամանակ Հոլոքոսթը կը շահարկէ՝ արդարացունմեր գտնելու իր ապօրէն քայլերուն:
Պոման ճանչցուած է իբրեւ ժամանակակից քաղաքակրթութեան ամենաերեւելի իմաստասէրներէն մին: Ան հաստատակամօրէն կը շեշտէ, թէ Իսրայէլ կը սարսափի խաղաղութենէն եւ կը խուսափի խաղաղութիւն հաստատելու փորձերէն: Պոմանի կարծիքով, իսրայէլացի քաղաքագէտները հաշտ աչքով չեն դիտեր խաղաղութեան համաձայնագիրներ կնքելու կարելիութիւնները, որովհետեւ անոնք չեն համոզուած ապրելու խաղաղութեան եւ առանց համընդհանուր զօրաշարժի պայմաններու տակ:
«Իսրայէլացիները այնքան ալ չեն մտահոգուիր Կազայէն արձակուող հրթիռներով, ընդհակառակը զիրեք կ’անհանգստացնէ երբ հրթիռները դադրին» դիտել կու տայ Պոման:
Սիկմոնթ Պոման ծնած է 1925-ին, Լեհաստան: 1947-ին, ընտանիքին անդամներուն հետ փոխադրուած է Իսրայէլ: 1971-էն մինչեւ մեր օրերը ան կ’ապրի Անգլիա: Տասնեակաւոր անգելէն եւ եբրայերէն լեզուներով գիրքերու հեղինակ Պոման իր համոզումները կը հիմնաւորէ, ընթերցողներուն ուշադրութեան յանձնելով, որ Իսրայէլի պետականութեան ծնունդէն ի վեր, անոր քաղաքականութեան եւ քայլերուն հետեւող ոեւէ անձնաւորութիւն դիւրաւ պիտի կռահէ այս իրողութիւնը:
Ո՞վ կրնայ Իսրայէլի մասին աւելի վաւերական գնահատական տալ քան Պոմանի նման անձնաւորութիւն մը: Ցաւալին այն է, որ արաբական աշխարհի բազմաթիւ ղեկավարներ մոռնալով զիրենք հարուածող չարիքին արմատները խրած են եղբայրասպանութեան եւ դաւադրութիւններու կոյր արշաւին մէջ:
Ա.
www.araraddailynews.com