Վարչապետ Նեժիպ Միքաթի երէկ հովանաւորեց «Ֆենիսիա» պանդոկին մէջ տեղի ունեցած կլոր սեղանը, որ նուիրուած էր «Դէպի երկրորդ հարիւրամեակ սլացող Լիբանանի երիտասարդութեան»:
Այս առիթով վարչապետ Միքաթի արտասանեց խօսք մը, որուն մէջ հաստատեց, որ նոր կառավարութիւն մը կազմելու աշխատանքները ընթացքի մէջ են` հակառակ բոլոր խոչընդոտներուն: «Ոչ ոքի պիտի արտօնուի արգելակել երկրին սահմանադրական երթը», հաստատեց ան:
Վարչապետ Միքաթի մաղթեց, որ Լիբանանի խորհրդարանը յաջողի ընտրել հանրապետութեան նախագահ մը` սահմանադրութեան ժամկէտին ընթացքին, որովհետեւ երկրին մարտահրաւէրները կը պահանջեն սահմանադրական հաստատութիւններուն գործակցութիւնը:
Միքաթի հաստատեց, որ իրենք կը գուրգուրան Լիբանանեան համալսարանին եւ արհեստից ուսման` աւելցնելով, որ պիտի չարտօնեն համալսարանական կամ կրթական որեւէ հաստատութեան մը քանդումը: «Լիբանան յանձնառու կը մնայ իր բոլոր զաւակներուն ուսում ջամբելու», յայտնեց ան:
Այս շրջագիծին մէջ, վարչապետ Միքաթի բարձր գնահատեց կրթութեան եւ բարձրագոյն ուսման նախարարի պաշտօնակատար Ապպաս Հալապիի ճիգերը, որոնց շնորհիւ կարելի եղաւ ուսուցիչներուն համար ասպարէզը շարունակելու մղիչ ազդակներ իրականացնել եւ վերադառնալ ներկայութեամբ ուսանելու կարելիութեան:
Ծովային սահմանագծումին անդրադառնալով` Միքաթի շեշտեց, որ սահմանագծումը իր ճիշդ հունին մէջ է եւ կը պաշտպանէ Լիբանանի շահերը:
Ան հարցականի տակ առաւ Թաէֆի համաձայնագիրին դէմ որդեգրուած քայլերը` հաստատելով, որ Թաէֆի համաձայնագիրը պարտադիր գործադրութեան համար չէ, սակայն քաոսէն շատ աւելի լաւ է եւ լիբանանցիները կը համախմբէ` ազգային միասնականութիւնն ու համերաշխութիւնը ամրապնդելու գաղափարին շուրջ:
Տնտեսական մարտահրաւէրներուն մասին վարչապետը յայտնեց, որ Լիբանանի դիմաց տակաւին կան կարճաժամկէտ մարտահրաւէրներ, որոնք սակայն վտանգաւոր են` նկատի ունենալով աշխարհի տնտեսական սառած իրավիճակը, Ուքրանիոյ պատերազմին հետեւանքները, ինչպէս նաեւ սնունդի ապահովութիւնը, որ առաջնահերթութեանց առաջնահերթութիւնն է:
«Մենք իսկական վտանգի դիմաց կը գտնուինք, եւ կոչ կ՛ուղղեմ բոլորին քննարկելու այս հարցերը», ըսաւ ան:
Միքաթի աւելցուց, որ ներկայ սերունդը կարողութիւն ունի հայրենիքը ոտքի կանգնեցնելու` աւելցնելով, որ պետութեան պարտականութիւնն է անոր տրամադրել ազդակներ, որոնք կ՛օժանդակեն անոր գոյատեւելու եւ երկրին փրկութեան նպատակով աշխատելու:
Ան շեշտեց, որ նախ պէտք է կանոնաւորել սահմանադրական հաստատութիւններուն աշխատանքը` հասնելով մինչեւ քաղաքական համախոհութեան, իբրեւ հիմնական նախապայման` տնտեսական տագնապի լուծման:
«Հակառակ տիրող ցաւալի իրավիճակին, կառավարութիւնը կը շարունակէ իր աշխատանքները եւ չէ յուսալքուած կամ աշխատանքը չէ կասեցուցած` կուտակուած բարդ հարցերը լուծելու նպատակով», շեշտեց վարչապետ Միքաթի: