Երէկ մահացաւ հայ անուանի դերասան, Հայաստանի Հանրապետութեան ժողովրդական արուեստագէտ Սօս Սարգսեան: Սօս Սարգսեան ծնած է 24 հոկտեմբեր 1929 թուականին` Ստեփանաւան քաղաքին մէջ: 1948 թուականին տեղափոխուած է Երեւան եւ աշխատած Երեւանի պատանի հանդիսատեսի թատրոնին մէջ` իբրեւ դերասան: 1954 թուականին աւարտած է Երեւանի գեղարուեստաթատերական հիմնարկի դերասանական բաժանմունքը: 1954-1991 թուականներուն եղած է Երեւանի Գաբրիէլ Սունդուկեանի անուան ակադեմական թատրոնի դերասան:
1991-ին Սօս Սարգսեան հիմնադրած է Համազգային թատրոնը: 1997-2006 թուականներուն Երեւանի թատրոնի եւ շարժապատկերի պետական հիմնարկի նախագահն էր, 2006-էն` հիմնարկի կառավարման խորհուրդի նախագահը: 2009 թուականին ընտրուած է Հայաստանի Հանրապետութեան Հանրային խորհուրդի անդամ:
Դերեր վերցուցած է քառասունէ աւելի գեղարուեստական ժապաւէններու մէջ. ինչպէս` «Նուագախումբի տղաները», «Եռանկիւնի», «Մենք ենք, մեր սարերը», «Նահապետ», «Խաթաբալա», «Ձորի Միրօ», «Սոլեարիս», Հայաստանի եւ Խորհրդային Միութեան մէջ նկարահանուած է բազմաթիւ այլ ժապաւէններու մէջ:
Սօս Սարգսեան եղած է ՀՅ Դաշնակցութեան անդամ: ՀՅԴ-ի կողմէ առաջադրուելով մասնակցած է Հայաստանի Հանրապետութեան առաջին նախագահական ընտրութիւններուն: